Bangor: Dyn wedi marw mewn gwrthdrawiad beic modur
- Cyhoeddwyd
Cafodd parafeddygon, yr heddlu a'r ambiwlans awyr eu gweld yn ymateb i'r digwyddiad
Mae dyn yn ei ugeiniau wedi marw mewn gwrthdrawiad beic modur ym Mangor fore Gwener.
Cafodd y gwasanaethau brys eu galw i'r digwyddiad ar Ffordd Garth ger tafarn Yr Iard Gychod ychydig cyn 11:00.
Dim ond un cerbyd - beic modur sydd wedi'i ddylunio ar gyfer defnydd oddi ar y ffordd - oedd yn rhan o'r gwrthdrawiad.
Bu farw'r dyn lleol yn y fan a'r lle, ac mae ei deulu wedi cael gwybod.
Mae Heddlu Gogledd Cymru yn apelio am wybodaeth, yn enwedig gan unrhyw un a welodd beiciau modur yn cael eu gyrru yn yr ardal cyn y digwyddiad.
