Y Bencampwriaeth: Abertawe 1-1 Barnsley

Llwyddodd Abertawe i sicrhau pwynt gartref yn erbyn Barnsley Ddydd Gwener Y Groglith, ond fe ddylai'r ymwelwyr fod wedi ennill.

Methodd Barnsley sawl cyfle yn yr hanner cyntaf ac er i Abertawe reoli'r meddiant Barnsley oedd yn edrych fel sgorio, gyda saith ergyd a thair ar y targed. Ond 0-0 oedd hi ar yr hanner.

Aeth yr ymwelwyr - sydd mewn perygl o ddisgyn i Adran Un - ar y blaen yn gynnar yn yr ail hanner gyda gôl gan Claudio Gomes.

Ac yna, eiliadau ar ôl i amddiffynnwr Yr Elyrch, Joel Latibeaudiere fynd yn agos iawn at sgorio drwy ei rwyd ei hun, llwyddodd Olivier Ntcham i ddod a'r sgôr yn gyfartal gyda gôl bert.

Mae Abertawe'n parhau yn y 14eg safle, ac mae eu gobeithion o gyrraedd y safleoedd ail-gyfle fwy neu lai ar ben am yn tymor.