Stormydd yn achosi llifogydd yng Nghricieth

Mae Heddlu'r Gogledd yn rhybuddio pobl i osgoi ardal Cricieth wedi i stormydd taranau, cenllysg a glaw achosi llifogydd yn yr ardal brynhawn Gwener.

Dywed y Gwasanaeth Tân bod y dŵr wedi effeithio ar sawl eiddo wrth i nifer o ddraeniau fethu ymdopi â llif y dŵr.

Cafodd y gwasanaethau brys eu galw toc wedi 13:20. Bu'n rhaid cau nifer o ffyrdd.

Wrth siarad â'r BBC dywedodd Michelle Jones o gaffi Tir a Môr yn y dre bod y cyfan yn "hynod drist".

"Mae llifogydd ar stad Pen Aber ac mae wedi bod yn gryn frwydr i atal y dŵr rhag mynd i dai.

"Ry'n ni wedi cael cenllysg, taranau ac ychydig o fellt y prynhawn 'ma.

"Mae hi wedi bod yn eitha drwg - dwi'm wedi gweld hi fel hyn o'r blaen.

"Mae fy ngŵr a fi wedi bod yn helpu dyn oedd yn methu mynd i'w dŷ gan ei fod wedi cael ei amgylchynu gan ddŵr."

Y cenllysg a ddisgynnodd yng Nghricieth brynhawn Gwener

Dywedodd rheolwr gorsaf gyda'r gwasanaeth, Steve Harris, bod dreiniau wedi gorlwytho wedi storm fawr leol wnaeth bara am rai oriau yn ardal Criccieth o amser cinio ymlaen.

Cafodd tair injan dân eu hanfon i'r dref er mwyn pwmpio dŵr o dai a'r strydoedd.

Apeliodd ar bobl i sicrhau bod dreiniau eu tai yn glir ac i gadw golwg ar gymdogion bregus rhag ofn eu bod angen help