Cynghrair y Pencampwyr: Y Seintiau Newydd 1-0 Linfield

Ryan Brobbel sgoriodd unig gôl y gêm yn Neuadd y Parc

Llwyddodd Y Seintiau Newydd i drechu Linfield yng nghymal cyntaf rownd ragbrofol gyntaf Cynghrair y Pencampwyr yn Neuadd y Parc nos Fawrth.

Cafodd y tîm cartref ddechrau da, ac er i'r bencampwyr Gogledd Iwerddon wella yn ystod yr hanner cyntaf, roedd hi'n parhau'n ddi-sgôr ar yr egwyl.

Daeth unig gôl y gêm wedi 57 munud, gyda Ryan Brobbel yn sgorio heibio i'r golwr Chris Johns i gornel isa'r rhwyd.

Yn yr hanner awr olaf fe wnaeth Connor Roberts ddau arbediad da er mwyn cadw pencampwyr Cymru ar y blaen, a selio'r fuddugoliaeth.

Bydd yr ail gymal yn cael ei gynnal yn Windsor Park, Belfast, nos Fawrth nesaf, 12 Gorffennaf.