Cyhuddo dyn o geisio treisio menyw yng Nghaerdydd
- Cyhoeddwyd
Mae dyn 44 oed wedi cael ei gyhuddo o geisio treisio menyw yng Nghaerdydd.
Fe ddigwyddodd yr ymosodiad honedig yng Ngerddi Sophia yn yr oriau mân ddydd Gwener, 8 Gorffennaf.
Mae Yusuf Nur, sydd heb gyfeiriad parhaol wedi ei gadw yn y ddalfa ar ôl mynd o flaen Llys Ynadon Caerdydd ddydd Sadwrn.
Mae ymholiadau Heddlu De Cymru'n parhau ac mae swyddogion arbenigol yn rhoi cefnogaeth i'r fenyw.
Mae'r Heddlu yn awyddus i siarad ag unrhyw un oedd yng Ngerddi Sophia, yn ystod oriau mân ddydd Gwener.
"O'r lluniau CCTV rydym yn gwybod bod nifer o bobl wedi gweld y sawl dan amheuaeth yn cael ei ddal gan aelod o'r cyhoedd cyn i'r heddlu gyrraedd," meddai'r Ditectif Sarjant Laura Parsons.
"Rydym yn apelio i'r tystion yma gysylltu â ni oherwydd mae'n bosib eu bod â gwybodaeth allweddol."
Mae'r llu hefyd yn awyddus i siarad ag unrhyw un oedd yn ardal Gerddi Sophia, Stryd y Castell a Heol y Gadeirlan rhwng 02:00 a 02:30 fore Gwener.