Rhybudd ambr: Prinder dŵr, tanau gwair a chanslo gemau chwaraeon

Mae tanau gwair yn parhau dros rannau o Gymru

Mae pryderon yn parhau am brinder dŵr a thanau gwair gyda rhybudd ambr am wres eithriadol dros rannau o Gymru.

Mae disgwyl i'r tymheredd gyrraedd 34C mewn rhannau o Gymru ddydd Sadwrn. Roedd hi'n 20C yn y Mwmbwls dros nos.

Fe ddywedodd Gwasanaeth Tan ac Achub iddyn nhw gael galwad brys toc cyn 05:00 fore Sadwrn o dân gwair ym mhentref Y Dyfawden yn Sir Fynwy.

Mae rhagor o ddigwyddiadau chwaraeon dros y penwythnos wedi eu canslo oherwydd y gwres hefyd.

Stormydd i ddod

Fe ddaeth y rhybudd ambr i rym ddydd Iau ar gyfer rhannau dwyreiniol Cymru a bydd yn para tan 23:59 nos Sul.

Yn y cyfamser, mae'r Swyddfa Dywydd wedi cyhoeddi rhybudd am stormydd mellt a tharanau ar gyfer dydd Llun.

Mae rhai gemau chwaraeon wedi eu canslo dros y penwythnos, gan gynnwys gêm gyfeillgar rhwng Clwb Rygbi Cymry Caerdydd a Bridgend Sports RFC oherwydd "tywydd twym a thir caled".

Ddydd Gwener, fe wnaeth Cyfoeth Naturiol Cymru a Llywodraeth Cymru gyfarfod â swyddogion o Lywodraeth y DU i drafod materion trawsffiniol.

Daeth cadarnhad ddydd Iau fod grŵp o arbenigwyr o Gymru am fonitro effaith y tywydd poeth ar lefelau dŵr.

'Galw am ddŵr wedi cynyddu 20%'

Prinder dŵr yng Nghronfa Ponsticill yn ystod y tywydd poeth

Wrth siarad ar raglen Radio Wales Breakfast fore Gwener, dywedodd Rheolwr Gyfarwyddwr gwasanaethau dŵr Dŵr Cymru, Ian Christie, eu bod yn monitro lefelau yn agos.

"Yn enwedig y penwythnos hwn, ry'n ni wir wedi ein gwthio o ran y tywydd poeth, ac mae galw am ddŵr i fyny 20%."

Fe ofynnodd i bobl beidio golchi eu ceir na dyfrhau eu planhigion am wythnos tan y daw cawodydd glaw.

"Mae gennym ni bryderon am ddŵr yfed yn Sir Benfro... a dyna pam ein bod ni wedi gosod gwaharddiad ar ddefnydd pibellau dŵr yno."

Ychwanegodd bod gan Dŵr Cymru "gwpl o ardaloedd" y maen nhw'n monitro'n ofalus i asesu a fydd angen cyflwyno gwaharddiadau pibellau dŵr yno hefyd.

RNLI Porthcawl

Gwylwyr y Glannau Porthcawl yn achub padlfyrddiwr

Mae na rybudd gan dimau achub ar draws y wlad i bobl fod yn ddiogel hefyd.

Fe ddywedodd Gwasanaeth Bad Achub Porthcawl ddydd Gwener eu bod wedi gorfod mynd i achub dros 100 o bobl dros gyfnod o ddeuddydd [dydd Mercher a Iau] oedd wedi cael eu dal gan y llanw ger Afon Ogwr.

Roedd dwsinau o bobl ar Draeth Ogwr wedi croesi'r afon i ochr arall y traeth yn gynharach ddydd Iau, heb sylwi y bydden nhw methu croesi yn ôl unwaith roedd y llanw'n codi unwaith eto, yn ogystal â phadlfyrddwyr yn mynd i drafferthion.

"Mae pryder mawr y gallai rhywun geisio croesi'r afon [unwaith mae'r llanw wedi codi] ac oherwydd y cerrynt sy'n llifo'n gyflym, gallen nhw gael eu llusgo i'r môr," meddai Simon Emms o RNLI Porthcawl.

Stormydd

Mae rhybudd melyn am stormydd mellt a tharanau mewn grym ar gyfer dydd Llun

Ar ôl gwres y penwythnos, mae disgwyl stormydd mellt a tharanau dros rannau o Gymru gyda'r Swyddfa Dywydd wedi cyflwyno rhybudd melyn.

Mae disgwyl glaw trwm, mellt, gwyntoedd cryfion a llifogydd posib rhwng 06:00 a 23:59 ddydd Llun.

Gallai gwasanaethau trên a bws gael eu canslo oherwydd y stormydd, yn ôl y Swyddfa Dywydd.