Angladd y Frenhines: 'Cyfle i fod yn rhan o hanes'

Mae Sharon a Mark Beresford o'r Wyddgrug ymhlith y Cymry sy'n teithio i Lundain ar gyfer angladd y Frenhines

Mae nifer o bobl o Gymru yn teithio i Lundain ar gyfer angladd y Frenhines Elizabeth II.

Yn eu plith roedd llond bws o bobl gychwynnodd ar eu taith o Abergele am 05:00 fore Sul, 18 Medi.

Fe gafodd Brenda Price a'i ffrind y ddau le olaf ar y bws.

"Dwi'n caru'r Frenhines, ro'n ni efo diddordeb mawr ers fy mod yn ifanc iawn" meddai.

"Roedd y coroni yn arbennig. Fe gafodd fy Nhad deledu fel ein bod ni a'r cymdogion yn gallu gwylio.

"Mae hi wedi bod yn berson arbennig i ni fel merched, a dwi wedi ei hedmygu ar hyd fy oes."

Mae Brenda Price wedi edmygu'r Frenhines ar hyd ei hoes

Dywedodd Sharon Beresford o'r Wyddgrug ei bod hi wedi difaru peidio mynd i ddigwyddiadau brenhinol eraill yn Llundain dros y blynyddoedd, ond mae hi'n falch o gael y cyfle y tro hwn.

"Er bod o'n ddigwyddiad trist rwy'n gobeithio y bydd o'n brofiad positif. Mae pawb yma ar gyfer yr un peth ac yn gyffredinol am yr un rhesymau," meddai.

"I fi mae'n rhan o hanes, a chawn ni mo'r cyfle i gael y profiad yma eto."

Peter a Julie Ellison ar eu ffordd i Lundain

Dywedodd Peter Ellison, o Pantymwyn ger yr Wyddgrug fod yna "deimlad o alar a dwysder" yn eu cymuned yn dilyn marwolaeth y Frenhines.

"Dwi'n meddwl bod pobl wedi eu synnu cymaint mae'r farwolaeth wedi effeithio arnyn nhw. 'Fallai nad oedden nhw yn teimlo y byddai'n mynd i fod yn gymaint o ddigwyddiad yn eu bywydau. Ond mae o," meddai

Mae Julie Ellison yn dweud ei bod hi yn ymwybodol y gallai hi fod yn brysur iawn yn Llundain, ond mae hi yn benderfynol o ffarwelio gyda'r Frenhines.

"Dim ots beth 'dych chi'n feddwl, roedd hi yna i'r wlad.

"Naethon ni feddwl yr awn ni i lawr yna dim ond iddi hi [Y Frenhines], a bod yn rhan o 'chydig o hanes."

Fe welodd Tony Carlyon o Landudno y Frenhines ar fwy nac un achlysur

Fe welodd Tony Carlyon o Landudno y Frenhines deirgwaith dros y blynyddoedd gan gynnwys digwyddiad "anhygoel" priodas Charles a Diana.

"Mae hi wedi bod yna trwy fy mywyd i. Fe fydd hi'n dasg anodd iawn i'w dilyn," meddai.

"Hyd yn oed os na welwn ni lawer yn Llundain dwi'n credu y bydd yr awyrgylch yn ddigon i'w wneud yn gofiadwy."

Mae Tracey Jones eisiau bod yn rhan o "ddigwyddiad arbennig"

Dywedodd Tracey Jones o Sir y Fflint bod ganddi hi gynlluniau penodol wedi cyrraedd Llundain.

"Fe gawn ni olwg ar hyd y ciw i weld a fydd hi'n bosibl i ni weld yr arch yn Neuadd Westminster," meddai.

"Fel arall, awn ni i weld y blodau yn Green Park ac i flasu'r awyrgylch tu allan i Abaty Westminster. Fe nawn ni geisio bod mor agos a gallwn ni i'r orymdaith angladdol.

"Mae'r wythnos hon wedi effeithio arna' i yn fyw nag yr oeddwn i'n meddwl, felly dwi jyst eisiau bod yn rhan o ddigwyddiad arbennig."