Cwpan y Byd: Cefnogwr Cymru wedi marw yn Qatar
- Cyhoeddwyd
Roedd Kevin Davies wedi teithio i Doha gyda'i fab a'i ffrindiau
Mae cefnogwr Cymru wedi marw yn Qatar ar ôl teithio yno i ddilyn y tîm yng Nghwpan y Byd.
Roedd Kevin Davies, 62 oed o Sir Benfro, wedi teithio i Doha gyda'i fab a'i ffrindiau.
Mae BBC Cymru yn deall y credir i Mr Davies farw o achosion naturiol ddydd Gwener, ac nid oedd wedi mynychu'r gêm yn erbyn Iran.
Mae ei deulu wedi cael cynnig cefnogaeth gan lysgenhadaeth y DU a chorff FSA Cymru, sy'n rhoi cymorth i gefnogwyr yn y twrnament.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Dywedodd Paul Corkrey o FSA Cymru fod pawb sy'n adnabod Mr Davies yn Qatar yn "drist iawn".
"Maen nhw [y criw oedd gyda Mr Davies] jest eisiau mynd adref a gweld gweddill y teulu," meddai.
"Roedden nhw i fod i fynd adref heddiw [dydd Sadwrn] ond mae hyn wedi effeithio ar y cynlluniau hynny oherwydd bod yn rhaid iddyn nhw gael dipyn o ddogfennau at ei gilydd.
"Maen nhw eisiau mynd adref cyn gynted â phosib, felly mae'n debyg y bydd hynny'n digwydd y peth cyntaf yfory."
Dywedodd Paul Corkrey o FSA Cymru fod cefnogaeth ar gael i'r teulu ganddyn nhw a'r gymdeithas bêl-droed
Fe roddodd y Ganolfan Dysgu Cymraeg Genedlaethol deyrnged i Mr Davies, gan ddweud mai ef fu'n arwain y ddarpariaeth yn Sir Benfro nes iddo ymddeol.
"Gyda chalon drom iawn y clywsom yn y Ganolfan Dysgu Cymraeg Genedlaethol am farwolaeth Kevin Davies," meddai'r ganolfan mewn datganiad.
"Un o garedigion yr iaith Gymraeg oedd Kevin, a braint oedd cydweithio ag ef wrth iddo arwain y ddarpariaeth Dysgu Cymraeg yn Sir Benfro tan ei ymddeoliad.
"Elwodd miloedd o ddysgwyr y Gymraeg o'i ddi-dwylledd a'i ymroddiad.
"Gwnaeth hefyd gyfraniad mawr i waith Urdd Gobaith Cymru dros y blynyddoedd yn ei filltir sgwâr ac yn genedlaethol.
"Rydym yn estyn pob cydymdeimlad at ei deulu a'i ffrindiau."
Fe wnaeth llefarydd ar ran y Swyddfa Dramor gadarnhau eu bod yn "cefnogi teulu dyn o Brydain sydd wedi marw yn Qatar".