Morgan: Starmer angen rhoi arian i Gymru os am fod o 'help'

Gofynnwyd i Eluned Morgan a oedd Syr Keir yn "help neu'n rhwystr" i Lafur Cymru

Mae angen i Keir Starmer roi mwy o arian i Gymru os yw am fod o "help" i Lafur yn etholiadau'r Senedd y flwyddyn nesaf, medd Prif Weinidog Cymru Eluned Morgan.

Dywedodd Ms Morgan ei bod yn cael "trafodaethau anffurfiol" gyda Syr Keir am ei gofynion, wrth i Lafur wynebu "bygythiad gwirioneddol" i'w statws fel plaid fwyaf Cymru.

Mae arolygon barn diweddar wedi awgrymu bod Llafur yn y trydydd safle, tu ôl i Blaid Cymru a Reform UK, cyn etholiadau'r Senedd ym Mai 2026.

Yn siarad gyda BBC Cymru yng nghynhadledd Llafur yn Lerpwl, dywedodd Ms Morgan mai Syr Keir yw'r person cywir i arwain y blaid.

Mae Eluned Morgan wedi dweud mai Syr Keir yw'r person cywir i arwain Llafur

Gofynnwyd i Ms Morgan yn Lerpwl a oedd Syr Keir yn "help neu'n rhwystr" i Lafur Cymru.

"Fe fydd yn help pe bai'n cynnig mwy o arian buddsoddi i fi rhwng nawr a'r etholiad," meddai Ms Morgan.

Mae Prif Weinidog Cymru wedi galw yn y gorffennol am newid y ffordd mae Cymru'n cael ei chyllido gan Lywodraeth y DU, llacio cyfyngiadau ar allu Llywodraeth Cymru i fenthyg arian, a darparu mwy o fuddsoddiad rheilffyrdd yma.

Ni wnaeth Ms Morgan roi manylion am y "trafodaethau anffurfiol" gyda Syr Keir, ond dywedodd fod Llywodraeth y DU "yn gweld bod angen iddyn nhw [arian ychwanegol] ddod i mewn, a deall bod bygythiad gwirioneddol yma a bod angen iddyn nhw weithredu'n sydyn".

Y Ddrig Goch ar gerdiau adnabod?

Dywedodd Ms Morgan hefyd ddydd Llun y dylai cardiau adnabod digidol pobl o Gymru fod â baner y Ddraig Goch arnyn nhw

Dywedodd y byddai hi'n "bendant" yn cyflwyno'r syniad i Lywodraeth y DU, gan ychwanegu fod arweinydd Llafur yr Alban, Anas Sarwar yn bwriadu gwneud yr un fath.

Yr wythnos ddiwethaf fe gadarnhaodd Syr Keir y byddai cardiau adnabod o'r fath yn cael eu cyflwyno erbyn diwedd cyfnod y Senedd hon.

Dan gynlluniau'r Llywodraeth Lafur yn San Steffan, bydd angen i bob oedolyn sydd am weithio yn y DU fod â cherdyn digidol o'r fath.

Dywedodd Ms Morgan nad oes unrhyw drafodaethau am edrychiad y cardiau mewn gwahanol wledydd wedi digwydd eto, ond ei bod hi'n gefnogol iawn o weld opsiwn i gynnwys baner Cymru.

"Mae hynny'n bendant yn rhywbeth y bydda i yn ei wthio mewn trafodaethau gyda Llywodraeth y DU," meddai.

Nid oes opsiwn ar hyn o bryd i bobl gynnwys baner Cymru ar basbortau neu drwyddedau gyrru, ond mae'r trwyddedau yn ddwyieithog.

Byddai'r cardiau digidol newydd - sy'n rhan o ymdrech gan y llywodraeth i fynd i'r afael â gweithio anghyfreithlon - yn cael eu storio ar ffonau symudol, ac yn cynnwys gwybodaeth fel enw, dyddiad geni, cyfeiriad a llun.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.