Person yn yr ysbyty ar ôl cael ei 'daflu' o reid Gŵyl y Gaeaf
- Cyhoeddwyd
Cadarnhaodd y Gweithgor Iechyd a Diogelwch fod "adroddiadau o anafiadau difrifol"
Mae person wedi cael ei gludo i'r ysbyty ar ôl i dri pherson gael eu "taflu" o reid yng Ngŵyl y Gaeaf yng Nghaerdydd.
Cafodd y gwasanaeth ambiwlans eu galw i'r safle am 17:15 ddydd Sadwrn yn dilyn digwyddiad ar reid Ice Skater.
Cafodd un person ei gludo i Ysbyty Athrofaol Cymru yn y brifddinas a dywedodd y trefnwyr y bydd "ymchwiliad llawn" i'r digwyddiad.
"Ry'n ni'n gweithio'n agos gyda'r rheiny sy'n rhedeg y reid a sefydliadau perthnasol i ymchwilio," medden nhw mewn datganiad.
"Bydd yn parhau ynghau tra bod hynny'n digwydd."
'Anafiadau difrifol'
Dywedodd un o staff Gŵyl y Gaeaf wrth BBC Cymru fod y reid ynghau ddydd Llun ac nad oedd yn sicr a fyddai'n ailagor ddydd Mawrth.
Mae arolygwyr diogelwch yn parhau i ymchwilio i'r digwyddiad
Cadarnhaodd y Gweithgor Iechyd a Diogelwch fod ymchwiliad wedi dechrau i'r "adroddiadau o anafiadau difrifol ar reid yng Ngŵyl y Gaeaf yng Nghaerdydd".
"Cafodd tri o bobl eu taflu o'r reid - mae un yn parhau yn yr ysbyty," meddai llefarydd.
Dywedodd Cyngor Caerdydd y byddan nhw'n cefnogi unrhyw ymchwiliad.