Tua 200 mewn gorymdaith gwrth-hiliaeth yng Nghaerdydd

Roedd yr orymdaith yn nodi diwrnod rhyngwladol yr UN ar gyfer Dileu Gwahaniaeth ar sail Hil

Fe wnaeth tua 200 o bobl ymgasglu ar gyfer gorymdaith gwrth-hiliaeth yng Nghaerdydd dydd Sadwrn.

Cafodd y digwyddiad ei drefnu er mwyn nodi diwrnod rhyngwladol y Cenhedloedd Unedig ar gyfer Dileu Gwahaniaeth ar sail Hil.

Roedd y bobl oedd yn bresennol hefyd yn protestio yn erbyn cyfraith newydd gan Lywodraeth y DU, fydd yn cyflwyno mesurau newydd i gael gwared ar ymfudwyr sy'n dod i'r wlad ar gychod bach.

Dywedodd llefarydd ar ran y Swyddfa Gartref: "Tra ein bod wedi ymrwymo i greu mwy o lwybrau i ddiogelwch ar gyfer pobl sy'n agored i niwed ar draws y byd, mae'n rhaid i ni gael gafael ar y cynnydd mewn mudo anghyfreithlon ac atal y cychod."

Dangos undod oedd neges yr orymdaith medd Nimi Trivedi

Roedd nifer o grwpiau gwahanol yn bresennol gan gynnwys undebau llafur, Refugees Welcome Here a Stand up to Racism Cymru, ynghyd â gwleidyddion o Lafur Cymru a Phlaid Cymru.

'Sefyll mewn undod yn erbyn hiliaeth'

Dywedodd trefnydd y digwyddiad, Nimi Trivedi o Stand up to Racism Cymru: "Mae heddiw am ddangos undod, y ffaith ein bod yn byw mewn cymdeithas amlddiwyllianol, a'n bod ni'n sefyll mewn undod, pobl ddu a gwyn, o ba bynnag gefndir, ein bod yn sefyll mewn undod yn erbyn hiliaeth."

Bydd y Bil Mudo Anghyfreithlon yn atal pobl sy'n cyrraedd y DU yn anghyfreithlon rhag hawlio lloches neu geisio am ddinasyddiaeth.

Mae Llywodraeth Cymru wedi ymrwymo i ddod â hiliaeth i ben trwy eu cynllun Cynllun Gweithredu Cymru Wrth-hiliol, sy'n anelu i greu Cymru wrth-hiliol erbyn 2030.

'Cymru yn genedl o ddiogelwch'

Dywedodd y Gweinidog Cyfiawnder Cymdeithasol, Jane Hutt: "Rydym yn edrych tuag at Gymru lle mae lleisiau a phrofiadau pobl ddu, Asiaidd ac o leiafrifoedd ethnig nid dim ond yn cael eu gweld a'u clywed, ond hefyd eu gweithredu arno.

"Mae Cymru hefyd yn genedl o ddiogelwch ac rydym yn parhau i alw ar yr Ysgrifennydd Cartref i ddatblygu ffyrdd diogel a chyfreithlon i'r DU, sydd ddim yn gofyn am deithiau peryglus, ac i sicrhau bod y rhai sydd yn barod yma yn gallu cyfrannu'n llawn i'n cymdeithas."

Dywedodd llefarydd ar ran y Swyddfa Gartref: "Mae gan y DU hanes balch iawn o ddarparu lloches i'r rhai sydd wir ei angen trwy ein ffyrdd diogel a chyfreithlon, gan gynnig diogelwch a lloches i bron hanner miliwn o ddynion, menywod a phlant.

"Tra ein bod wedi ymrwymo i greu mwy o lwybrau i ddiogelwch ar gyfer pobl sy'n agored i niwed ar draws y byd, mae'n rhaid i ni gael gafael ar y cynnydd mewn mudo anghyfreithlon ac atal y cychod.

"Dyna pan ein bod yn cyflwyno deddfwriaeth newydd fydd yn gweld pobl sy'n dod i'r DU yn anghyfreithlon yn wynebu cael eu dal a'u symud allan o'r wlad yn gyflym."