Arestio dyn ar amheuaeth o lofruddiaeth yng Nghaerdydd

Cafodd yr heddlu eu galw i'r digwyddiad am tua 09:00 fore Sul

Mae dyn wedi cael ei arestio ar amheuaeth o lofruddiaeth wedi ymosodiad difrifol ym Mae Caerdydd fore Sul.

Cafodd swyddogion eu galw i'r digwyddiad mewn eiddo ar Ffordd Belmont yn ardal Tre-biwt toc wedi 09:00.

Dywedodd yr heddlu bod dyn 64 oed wedi marw a bod dyn arall 38 oed yn cael ei holi ar amheuaeth o lofruddiaeth.

Roedd nifer o ffyrdd wedi cau o amgylch Bae Caerdydd ddydd Sul wrth i'r heddlu ymchwilio i'r ymosodiad.

Dywedodd llefarydd ar ran Heddlu'r De nad ydyn nhw'n chwilio am unrhyw un arall mewn cysylltiad â'r digwyddiad.