Môn: Bwriad i godi gwesty moethus ar safle hen ysgol

Roedd Canolfan Penrallt yn arfer bod yn ysgol adnabyddus ar yr ynys

Fe allai hen ysgol ar Ynys Môn gael ei throi yn westy moethus.

Mae'r cyngor sir wedi derbyn cais i drawsnewid Canolfan Penrallt, Llangefni, yn westy 13 ystafell.

Byddai'r safle, yn ôl y datblygwyr, hefyd yn fan ar gyfer cynnal priodasau.

Dywedodd yr ymgeisydd Jerry Huppert y byddai 14 o swyddi llawn amser a chwe swydd rhan amser yn cael eu creu.

Roedd yr adeilad, sydd wedi ei leoli ger cofeb rhyfel Llangefni a chanolfan hamdden Plas Arthur, yn arfer bod yn rhan o gampws Coleg Menai.

Cyn hynny roedd yn ysgol amlwg, a oedd yn cael ei hadnabod fel 'Ysgol Sirol Llangefni' cyn cael ei difrodi gan dân yn 1939.

Cafodd Ysgol Gyfun Llangefni gerllaw ei hadeiladu ar ddechrau'r 1950au.

Mae disgwyl i adran gynllunio Cyngor Môn ystyried y cais dros y misoedd i ddod.