Heddwas yn gwadu ymosod yn rhywiol ar blentyn

Mae John Stringer yn gwadu pum cyhuddiad yn ymwneud â cham-drin plentyn

Mae rheithgor yng Nghaerdydd wedi clywed bod swyddog gyda Heddlu Gwent wedi ymosod yn rhywiol ar blentyn dan 13 oed.

Mae John Stringer, sy'n 42 oed ac o Gaerdydd, yn gwadu pum cyhuddiad yn ymwneud â cham-drin plentyn.

Clywodd y llys bod Mr Stringer wedi cael ei arestio wedi i'r ferch siarad gyda chymhorthydd dysgu yn yr ysgol.

Dywedodd Ian Wright ar ran yr erlyniad y byddai Mr Stringer, yn ôl y ferch, "yn ei chyffwrdd mewn ffordd rywiol".

Roedd y ferch hefyd yn honni y byddai'n "dangos fideos iddo o ferched hanner noeth" ac "achosi iddi wneud yr un peth ag oedd y merched yn ei wneud yn y fideo".

Fe gafodd rhieni'r ferch eu galw i'r ysgol, yr heddlu eu hysbysu a Mr Stringer ei arestio yr un diwrnod.

Mae'r achos yn cael ei gynnal yn Llys y Goron Caerdydd

Clywodd y llys bod y ferch wedi recordio cyfweliad i'r heddlu yn y dyddiau canlynol.

Roedd Mr Stringer, meddai, wedi mynnu iddi wneud yr hyn y dywedodd wrthi am ei wneud, er ei hamharodrwydd hithau.

Honnodd y ferch hefyd i Mr Stringer ddweud taw "hithau fyddai ar fai" pe bai ei rhieni'n dod i wybod beth oedd yn digwydd ac yn ei gael yntau i drwbl.

Mae Mr Stringer wedi pledio'n ddieuog i bum cyhuddiad - dau o ymosod yn rhywiol, dau o achosi neu ysgogi plentyn dan 13 i gymryd rhan mewn gweithred rywiol ac un o achosi plentyn i wylio gweithred rywiol.

Mae'r achos yn parhau.