Y cyn-weinidog Lee Waters i adael y Senedd yn 2026

Mae Lee Waters wedi cyhoeddi ei fod am ymddiswyddo yn 2026

Mae’r Aelod o'r Senedd Lee Waters wedi cyhoeddi na fydd yn ceisio cael ei ethol yn 2026, gan ddweud ei fod wedi treulio digon o amser mewn gwleidyddiaeth.

Mae Mr Waters wedi bod yn aelod dros Lanelli ers 2016, ac ef oedd y dirprwy weinidog dros yr economi a thrafnidiaeth nes i Vaughan Gething gael ei ethol yn brif weinidog yn gynharach eleni.

Roedd yn ffigwr dadleuol yn ystod y cyfnod hwnnw wrth iddo gyflwyno'r gyfraith a oedd yn gosod terfyn cyflymder o 20mya mewn sawl man.

Wrth ysgrifennu ar wefan LinkedIn dywedodd nad oedd yn cynnig ei enw i gael ei ddewis fel ymgeisydd ar gyfer etholiad y Senedd yn 2026.

Ysgrifennodd: “Erbyn yr etholiad nesaf fe fydda i wedi treulio degawd llawn yn ein Senedd.

"Dydw i erioed wedi ystyried swydd etholedig yn yrfa, ond yn hytrach yn wasanaeth cyhoeddus.

“Rydw i wedi rhoi 100% i’r rôl ac wedi gwneud fy ngorau glas fel cynrychiolydd etholaeth ac fel gweinidog.

"Rwy'n ddiolchgar i bobl Llanelli a Chwm Gwendraeth am roi'r cyfle i mi wasanaethu. Mae wedi bod yn fraint wirioneddol, ac yn her enfawr."

Pan wnaeth Mr Waters y cyhoeddiad yn gynharach eleni ei fod yn gadael ei rôl fel gweinidog, dywedodd y byddai hefyd yn gadael X, sef Twitter gynt.

Ysgrifennodd ar y pryd: “Dros y 15 mlynedd ddiwethaf rydw i wedi treulio gormod o amser ar Twitter.

Ychwanegodd ei fod yn "derbyn pentwr o sylwadau cas hyd yn oed ar y negeseuon mwyaf diniwed.”

Cafodd arwyddion ffyrdd eu fandaleiddio wrth i'r polisi 20mya ddod i rym

Ym mis Medi 2023 goroesodd Mr Waters bleidlais o ddiffyg hyder yn y Senedd a gafodd ei alw gan y Ceidwadwyr Cymreig.

Astudiodd Mr Waters, o Rydaman, Sir Gaerfyrddin, wleidyddiaeth ym Mhrifysgol Aberystwyth ar ôl gadael Ysgol Dyffryn Aman.

Ymunodd â’r Blaid Lafur, gan gymryd swydd gydag Ysgrifennydd Cymru ar y pryd Ron Davies yn ei helpu i redeg ei ymgyrch i ddod yn arweinydd Llafur Cymru yn 1998 cyn datganoli.

Yna fe ymunodd Mr Waters â'r BBC, a bu'n gweithio fel cynhyrchydd newyddion radio am nifer o flynyddoedd.

Symudodd i ITV Cymru, gan ddod yn brif ohebydd gwleidyddol.

Yn 2007 daeth Mr Waters yn gyfarwyddwr yr elusen feicio Sustrans Cymru, sy'n ymgyrchu ar wella seilwaith cerdded a seiclo.

Gadawodd i arwain melin drafod y Sefydliad Materion Cymreig yn 2013, cyn rhedeg yn llwyddiannus fel ymgeisydd Llafur ar gyfer sedd Llanelli.

Mae Mr Waters yn briod ac mae ganddo ddau o blant, ac mae'n rhannu ei amser rhwng ei gartref ym Mro Morgannwg a'i etholaeth yn Llanelli.