Cymro yn Qatar: 'Sefyllfa sensitif ac anodd ar hyn o bryd'
Fe welodd Rhodri Ogwen Williams daflegrau Iran yn anelu at ganolfan filwrol Americanaidd ger Doha ac yn cael eu saethu i lawr gan system amddiffyn Qatar
- Cyhoeddwyd
Mae darlledwr o Gymru sy'n byw yn Qatar wedi disgrifio'r profiad o fod yn dyst i ymosodiad gan Iran ar safleoedd milwrol yr Unol Daleithiau yn y wlad.
Roedd Rhodri Ogwen Williams, sy'n byw yn y brifddinas Doha, yn chwarae golff "gyda rhywun sy'n delio gyda'r pethau 'ma ar y lefel uchaf" pan welodd daflegrau'n anelu at ganolfan Al Udeid.
"O'dd e wedi cael bach o sioc," dywedodd wrth raglen Post Prynhawn BBC Radio Cymru.
"Fel o'dden ni ar y pedwerydd twll dyma ni'n gweld sawl taflegryn yn dod lawr tuag at Qatar - a ni'n gweld wedyn amddiffyn Qatar yn mynd i fyny."
Roedd yna ddisgwyl i Iran daro'n ôl yn hwyr neu'n hwyrach wedi i'r Unol Daleithiau fomio safleoedd niwclear yn y wlad dros y penwythnos.
Mae llygaid y byd yn troi bellach at Arlywydd America, Donald Trump, i weld a fydd yntau'n penderfynu i gynnal ymosodiadau pellach ar Iran mewn ymateb.
'Fi'n poeni tam' bach'
Dywedodd Rhodri Ogwen Williams bod cyngor wedi cyrraedd tua dechrau eu gêm golff gan lysgenhadaeth Prydain i Brydeinwyr "fynd am gysgod ac i beidio mynd allan".
Daeth difrifoldeb y sefyllfa i'r amlwg fwy fyth pan glywson nhw fod "maes awyr Qatar International wedi cau".
Dywedodd fod Qatar "yn lwcus iawn i gael system gorchudd haearn, fel sy' gyda nhw yn Israel" - system a gafodd ei gosod gan yr Americanwyr gan fod "maes awyr mwyaf America y tu allan i'r Unol Daleithau fan hyn yn Qatar".
"Dyna ydy'r targed ond dros yr wythnos i 10 diwrnod diwetha' mae'r awyrennau i gyd wedi gadael y maes awyr.
"Fi'n poeni tam' bach, dwi' nawr yn mynd nôl gartre i gysgodi i gael gweld beth sy'n gweithio."
Ychwanegodd mewn cyfweliad ar gyfer rhaglen Newyddion S4C, fod "petha' bach yn anodd a bach yn sensitif 'ma ar hyn o bryd", nid yn unig yn Qatar ei hun ond mewn gwledydd cyfagos eraill fel Bahrain a Kuwait.