Rhybudd am wyntoedd cryfion i Gymru gyfan

Mae'r rhybudd yn berthnasol i Gymru gyfan

Mae'r Swyddfa Dywydd wedi cyhoeddi rhybudd melyn am wyntoedd cryfion ar draws Cymru dros y penwythnos.

Mae'r rhybudd wedi bod mewn grym ers 07:00 dydd Sadwrn a'n para tan 21:00 dydd Sul.

Fe allai gwyntoedd hyrddio hyd at 60mya, gan gyrraedd 70mya mewn mannau arfordirol, meddai'r Swyddfa Dywydd.

Roedd y rhybudd yn berthnasol i ardaloedd ar hyd arfordir y gogledd ddydd Sadwrn ac i Gymru gyfan ddydd Sul.

Fe allai'r amodau greu trafferthion i yrwyr, yn ogystal ag amharu ar gyflenwadau trydan a thrafnidiaeth gyhoeddus.