Clwb rygbi yn ymddiheuro ar ôl neges 'ddim ar gyfer merched'

GnollHuw Evans Picture Agency

Dywedodd Castell-nedd yn wreiddiol eu bod am "herio a newid camsyniadau am rygbi menywod"

Mae Clwb Rygbi Castell-nedd wedi ymddiheuro ar ôl cael eu beirniadu am hyrwyddo gêm gan ddefnyddio'r slogan "yn sicr dyw'r un yma ddim ar gyfer merched".

Mewn neges fore Mawrth, dywedodd Matty Young a ysgrifennodd y neges ar un o gyfrifon y clwb nos Lun, ei fod "wir yn ymddiheuro am unrhyw niwed sydd wedi ei achosi".

Dywedodd mai'r "syniad o'r cychwyn oedd bwrw golwg ar y misogyny sydd dal yn bresennol o fewn rygbi," gan roi llais i'r merched sy'n cynrychioli'r clwb.

"Dwi nawr yn cydnabod nad oedd y neges wreiddiol yn adlewyrchu'r neges honno, ac am hynny dwi'n sori."

Roedd y neges wreiddiol ar X yn cynnwys yr hashnod '#NotForGirls' gan orffen gyda'r neges: "Stay tuned… Not everything is as it seems."

Roedd y neges ar X yn hyrwyddo eu gêm yn erbyn eu gelynion lleol Llangennech, a fydd yn digwydd ar ddydd Gwener, 28 Mawrth.

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan Siwan Lillicrap

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X a pholisi preifatrwydd cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Cafodd y neges wreiddiol gryn sylw ar y cyfryngau cymdeithasol, gyda chyn-gapten Cymru a hyfforddwr presennol Cymru dan-18, Siwan Lillicrap yn ymateb ar X.

Dywedodd: "Dwi methu credu'r hyn dwi wedi ei weld - gwarth arnoch @neathrfc! Anwybodus, annerbyniol, ac amhriodol."

Dywedodd AS Gŵyr a'r cyn-chwaraewr rhyngwladol, Tonia Antoniazzi: "Mae hyn yn siomedig i glwb sydd â hanes cryf ac etifedd sydd wedi ysbrydoli cymaint o fenywod a merched i eisiau chwarae ac wedi chwarae!"

Un arall fu'n ymateb i'r neges oedd cyn-chwaraewr Cymru, Lowri Norkett Morgan gan ddweud fod y neges yn "hollol afiach".

Dywedodd llefarydd ar ran Undeb Rygbi Cymru: "Fe wnaethom ni ofyn i Gastell-nedd i ddileu'r neges cyn gynted â phosib, ac wrth gwrs rydym ddim yn derbyn y teimlad o fewn y neges."

Cafodd y neges wreiddiol ei chyhoeddi am 18:04 nos Lun, a'i dileu yn fuan wedi 21:00.

'Annog trafodaeth'

Yn hwyrach nos Lun, fe wnaeth Mr Young ymddiheuro am "unrhyw ddryswch a achoswyd" a bod y clwb wedi "ymrwymo i symud ymlaen gyda'n gilydd" mewn datganiad ar y cyfryngau cymdeithasol.

Roedd yn nodi bod eu "hymgyrch ddiweddar wedi ei gynllunio i annog trafodaeth, ac rydym yn deall efallai ei fod wedi achosi dryswch, ac wedi brifo rhai".

"Nid yw ein hymrwymiad i dyfu a chryfhau'r clwb - ar bob lefel - erioed wedi bod yn gryfach," meddai.

"Rydym yn deall bod camsyniadau am rygbi menywod yn parhau i fodoli - ond yn hytrach na'u trafod, rydym yma i'w herio a'u newid."

Pynciau cysylltiedig

Straeon perthnasol