Dyfarniad rhywedd â 'goblygiadau sylweddol i wasanaethau cyhoeddus'

Dywedodd Eluned Morgan bod y llywodraeth yn cydnabod "bod llawer o ofn ac ansicrwydd" wedi dyfarniad y Goruchaf Lys

Bydd "goblygiadau sylweddol i wasanaethau cyhoeddus" yn sgil dyfarniad y Goruchaf Lys bod diffiniad o fenyw dan gyfraith cydraddoldeb yn seiliedig ar ryw fiolegol, meddai Eluned Morgan.

Dywedodd y prif weinidog y bydd Llywodraeth Cymru yn gweithredu "gyda pharch, tosturi a charedigrwydd", ond ei bod yn cymryd dyfarniad y llys "o ddifrif".

"Byddwn yn cymryd ein hamser nawr i weithio drwy oblygiadau hyn," meddai wrth y Senedd.

"Mae goblygiadau sylweddol i wasanaethau cyhoeddus."

Ychwanegodd y byddai'r llywodraeth yn dweud mwy am effaith y dyfarniad "yn ddiweddarach yn yr haf".

'Llawer o ofn ac ansicrwydd'

Wrth wynebu cwestiynau yn y Senedd am y tro cyntaf ers dyfarniad unfrydol y llys, dyfynnodd sylwadau'r Arglwydd Hodge a ddywedodd nad oedd yn fuddugoliaeth i'r un grŵp dros un arall.

Dywedodd Eluned Morgan bod y llywodraeth yn cydnabod "bod llawer o ofn ac ansicrwydd mewn sawl lle".

Mewn datganiad ysgrifenedig ar wahân, dywedodd Llywodraeth Cymru ei bod yn "parchu penderfyniad y Goruchaf Lys" ac "yn cymryd y camau sy'n ofynnol i fodloni ein rhwymedigaethau o dan Ddeddf Cydraddoldeb 2010 fel yr eglurwyd gan y dyfarniad".

"Nid yw gwahaniaethu ac aflonyddu yn erbyn pob person ag un neu fwy o nodweddion gwarchodedig yn gyfreithlon, nac yn dderbyniol mewn unrhyw ffordd," ychwanegodd.

'Synnwyr cyffredin' oedd y dyfarniad meddai Laura Anne Jones

Dywedodd yr AS Ceidwadol Laura Anne Jones fod dyfarniad y llys yn "fuddugoliaeth i fenywod a merched ledled Cymru, ac i synnwyr cyffredin".

Ychwanegodd nad oedd hi'n gwrthwynebu hawliau unrhyw un, ond ei bod hi eisiau "amddiffyn menywod a merched a sicrhau tegwch".

Dywedodd yr AS Llafur Hannah Blythyn bod aelodau'r gymuned LHDTC+ wedi cysylltu â hi yn yr wythnos a hanner ddiwethaf "yn eu dagrau ac yn ofnus ynghylch yr hyn y gallai ei olygu iddyn nhw".

Fel rhan o'i chynllun gweithredu LHDTC+, mae Llywodraeth Cymru wedi dweud yn flaenorol y bydd yn darparu canllawiau i ysgolion ar gefnogi plant traws.

Ond bellach mae'r llywodraeth wedi dweud bod ymgynghoriad wedi ei ohirio er mwyn sicrhau bod y canllawiau wedi eu selio ar dystiolaeth ddiweddar.

Dywedodd llefarydd bod y llywodraeth eisiau i'r canllawiau barchu anghenion plant a phobl ifanc, yn ogystal ag "adlewyrchu lleisiau rhieni".