Babi naw mis oed wedi marw yn dilyn ymosodiad ci

Mae presenoldeb yr heddlu wedi bod yn amlwg yn Rogiet ddydd Llun wrth i'r ymchwiliad i'r digwyddiad nos Sul barhau

Mae babi naw mis oed wedi marw yn dilyn ymosodiad ci yn Sir Fynwy.

Dywedodd Heddlu Gwent nos Sul eu bod wedi "derbyn adroddiad o ymosodiad gan gi" mewn tŷ ar stryd Crossway ym mhentref Rogiet, ger Cil-y-coed tua 18:00.

Fe gafodd swyddogion heddlu a pharafeddygon y Gwasanaeth Ambiwlans eu hanfon i'r cyfeiriad, ble y cadarnhawyd bod bachgen naw mis oed wedi marw yn y fan a'r lle.

Fe gafodd y ci, oedd yn eiddo i aelod o'r teulu, ei symud o'r eiddo, ac mewn datganiad yn hwyr brynhawn Llun fe gadarnhaodd yr heddlu bod y ci bellach wedi cael ei ddifa gan filfeddyg.

Dywed y llu bod neb wedi cael ei arestio, a bod ymholiadau'n parhau i gadarnhau brîd y ci ac "i ddeall amgylchiadau'r digwyddiad trasig yma".

Ychwanegodd y datganiad fod swyddogion arbenigol yn rhoi cefnogaeth i deulu'r plentyn.

Tawel iawn ar y stryd ben bore Llun

Erbyn 22:00 nos Sul roedd y rhan fwyaf o gerbydau'r Gwasanaeth Ambiwlans a'r heddlu wedi mynd, ac yn eu lle roedd timau archwilio manwl wedi cyrraedd.

Yn natganiad cychwynnol y llu yn cadarnhau'r farwolaeth, dywedodd y Prif Uwch-arolygydd John Davies: "Rydym yn deall y bydd yna bryderon ynghylch y digwyddiad yma, ond mae swyddogion yn bresennol ac fe fyddan ni gwneud rhagor o ymholiadau wrth i'r ymchwiliad fynd yn ei flaen.

"Os oes gyda chi bryderon neu wybodaeth, dewch atom er mwyn siarad â ni."

Dywedodd gohebydd BBC Cymru, Alun Thomas, ben bore Llun fod swyddogion heddlu yn dal ar ddyletswydd y tu fas i dŷ yn Crossways.

"Mae hi'n dawel iawn ar y stryd fore Llun, yn wahanol iawn i'r olygfa nos Sul pan roedd nifer o gerbydau'r heddlu a'r gwasanaeth ambiwlans yma.

"Mae Rogiet yn bentre' tawel ger Cil-y-Coed nid nepell o'r pontydd dros Afon Hafren.

"Mae nifer sy'n byw yma yn teithio i'w gwaith ym Mryste, gyda'r ardal wedi dod yn fwy apelgar ers i'r tollau dros y pontydd gael eu dileu rai blynyddoedd yn ôl."

'Teimlad dwys o sioc'

Cafodd apêl ei sefydlu fore Llun gyda'r nod o godi arian ar gyfer angladd y bachgen ac o fewn ychydig oriau roedd y targed o £3,500 wedi ei gyrraedd

Dywedodd y Cynghorydd Peter Strong wrth y BBC fod y "pentref mewn galar heddiw".

"Mae o'n deimlad dwfn a dwys o sioc y gallai rhywbeth fel hyn ddigwydd yng nghanol ein cymuned dawel ni."

Ychwanegodd fod "colli babi yn yr amgylchiadau hyn yn ofnadwy", ac na allai "hyd yn oed ddechrau dychmygu'r galar y mae'r teulu'n ei deimlo'r bore yma".

Diolchodd Mr Strong i'r gwasanaethau brys, gan ganmol ysbryd cymunedol yr ardal, a gofyn i bobl roi llonydd i'r teulu.

Mae'r farwolaeth wedi llorio'r gymuned leol, medd Katherine Close o fenter Rogiet Community Junction

Mae'r farwolaeth wedi ysgwyd pawb, yn ôl un o ymddiriedolwyr y fenter gymunedol Rogiet Community Junction, sy'n rhedeg siop a chaffi yn y pentref.

"Mae'n wirioneddol drasig," dywedodd Katherine Close. "Rwy'n teimlo dros y teulu am yr hyn maen nhw'n mynd trwyddo, a dros y stryd i gyd yn wir achos ry'n ni'n gymuned glos ac fe fydd yn eu llorio."

Mae'r caffi, meddai, yn cynnig "lle diogel i bobl ddod a siarad", cael "ysgwydd i grio arno" neu "gefnogaeth i'r rhai sydd ei angen".

Mewn pentref "lle ry'ch chi'n nabod pawb", ychwanegodd bod "ein drysau wastad ar agor i bobl sydd angen dod i mewn a siarad".

Dywedodd y dirprwy brif weinidog, Huw Irranca-Davies AS, bod ei feddyliau gyda'r teulu sydd wedi eu heffeithio.

"Mae'n drasiedi enfawr, ac mae pawb ohonom ni yn meddwl am y teulu," meddai.