Zip World yn cau eu safle yn Sir Conwy lai na blwyddyn ers agor

Fe wnaeth Zip World agor canolfan antur dan do yn Nolgarrog y llynedd

Mae cwmni Zip World wedi cyhoeddi eu bod yn cau eu safle yn Sir Conwy.

Fe wnaeth y cwmni agor canolfan antur dan do yn Nolgarrog yn ystod gwyliau'r Pasg y llynedd wedi i Barc Antur Eryri gau eu canolfan ar y safle yn 2023.

Mewn datganiad, dywedodd y cwmni eu bod wedi "ystyried yn ddwys" cyn dod i benderfyniad.

Dywedodd llefarydd ar ran y cwmni: "Doedd hyn ddim yn benderfyniad hawdd ac rydyn ni'n ddiolchgar i'n holl ymwelwyr a chefnogwyr wnaeth wneud y safle yn le antur dan do mor arbennig trwy gydol 2024."

Mae'r cwmni yn dweud y byddan nhw' n cysylltu â phobl sydd wedi archebu tocynnau ar gyfer y safle yr wythnos hon i drafod opsiynau.

Mae'r cwmni'n berchen ar bedwar safle arall yng Nghymru ac yn eu datganiad, maen nhw'n dweud eu bod nhw'n "edrych ymlaen i groesawu pobl" i'r lleoliadau hynny "am flynyddoedd i ddod".