Enwebu Clwb Ffermwyr Ifanc o Geredigion am eu gwaith cymunedol

"Os byddwch chi’n edrych ar ôl eich cymuned, bydd eich cymuned yn edrych ar ôl chi," meddai Heulwen Evans

Mae Clwb Ffermwyr Ifanc Llangwyryfon wedi cyrraedd rowndiau terfynol Gwobrau Cymunedol Prydeinig y mudiad.

Fe fydd 20 o aelodau’r clwb yn teithio i Birmingham dros y penwythnos i weld os fyddan nhw'n llwyddo i gipio Gwobr Ysbryd Cymunedol Ffederasiwn Cenedlaethol Clybiau Ffermwyr Ifanc ar gyfer 2024.

Mae’r clybiau eraill sydd wedi’u henwebu ar gyfer y wobr yn dod o Gaint, Sir Amwythig, a Cumbria.

Clwb Llangwyryfon o Geredigion yw’r unig un o Gymru i gyrraedd y rowndiau terfynol.

Mae clybiau ffermwyr ifanc yn "hanfodol" i gymunedau cefn gwlad, meddai Eiry Williams

Yn ôl Eiry Williams, Swyddog y Wasg CFfI Llangwyryfon, byddai cefn gwlad yn “lle lawer tlotach” heb fudiad y ffermwyr ifanc.

“Fi’n credu bod e’n dangos bod mudiad y ffermwyr ifanc yn beth hanfodol yng nghefn gwlad.

“Ni’n neud shwd gyment o waith gwirfoddol ar draws Cymru a chodi lot o arian tuag at elusennau.

“Maen rhywbeth hanfodol. Bydde ni’n argymell unrhyw un i fynd i’w clwb lleol nhw er mwyn parhau i gadw ein cymunedau ni’n fyw trwy’r CFfI.”

Mae aelodau'r Clwb Llangwyryfon yn gwneud pob math o waith gwirfoddol yn lleol

Mae 5,500 o aelodau gan CFfI Cymru - a hynny'n cynnwys pobl ifanc rhwng 10 a 28 oed.

Yr amcan yw bod dros 1.1 miliwn o oriau gwaith gwirfoddol yn cael eu gwneud yn flynyddol gan aelodau.

Bob blwyddyn, mae clwb Llangwyryfon yn trefnu noson Y Goeden Nadolig gan roi anrheg i bob plentyn bach yr ardal.

Mae Bwrlwm Bro bob haf, sy’n cynnwys rasys i blant, carnifal a stondinau.

Yn ogystal, mae aelodau’r clwb yn torri’r gwair yn yr hen fynwent ac yn trefnu Treialon Cŵn Defaid yn yr ardal.

Rhai o aelodau ifanc y clwb yn mwynhau gwahanol weithgareddau Calan Gaeaf

Eleni hefyd fe wnaeth rhai o aelodau’r clwb arwain ar gais llwyddiannus i gael £17,000 i roi system paneli solar ar do neuadd y pentref, lle mae’r clwb yn cyfarfod yn wythnosol.

Un sydd ar y pwyllgor hwnnw, yn cynrychioli’r clwb, yw Heulwen Evans.

“Os byddwch chi’n edrych ar ôl eich cymuned, bydd eich cymuned yn edrych ar ôl chi," meddai.

“Roedden ni’n gweld bod y neuadd yn gwneud colled ariannol pob blwyddyn ac roedd angen gwneud rhywbeth am y peth.

“Ni wedi gwneud cais am sawl grant er mwyn galluogi gosod system wresogi newydd yno a gosod paneli solar ar y to.

“Buon ni’n ffodus iawn i gael arian drwy grant Cynnal y Cardi gan Gyngor Ceredigion, a hefyd y Cyngor Cymuned."

Bydd canlyniadau’r gwobrau yn cael eu cyhoeddi mewn seremoni yn Birmingham nos Sadwrn.

Daeth Clwb Uwchaled i’r brig yn y gystadleuaeth ddwy flynedd yn ôl, gyda Llangwyryfon yn gobeithio efelychu’r gamp eleni.