Dyn 25 oed o Wynedd wedi marw ar ôl disgyn o falconi ym Malta

Llun y gwesty — Disgrifiad o’r llun,
Fe ddigwyddodd y digwyddiad yng ngwesty Cavalieri Art

4 awr yn ôl

Mae dyn ifanc 25 oed o Wynedd wedi marw ar ôl iddo ddisgyn o falconi gwesty ym Malta yn gynnar fore Gwener.

Dywedodd llefarydd ar ran yr Heddlu ym Malta eu bod nhw wedi cael eu galw i Triq Spinola, St Julien's tua 4:15 fore Gwener (11 o Orffennaf).

Fe ddigwyddodd y digwyddiad yng ngwesty Cavalieri Art.

Fe wnaeth aelodau'r tîm meddygol gadarnhau y bu farw'r dyn ar y safle.

Ychwanegwyd bod ymholiadau cychwynnol yn awgrymu bod y dyn ifanc wedi marw ar ôl iddo ddisgyn o falconi.

Mewn datganiad dywedodd Sian Gwenllian, aelod o'r senedd dros Arfon: "Mae'r newyddion am farwolaeth dyn 25 oed o Wynedd ym Malta yn wirioneddol erchyll.

"Mae'n gwbl amhosibl dirnad poen y teulu. Rydw innau, ynghyd â gweddill pobl Gwynedd yn meddwl amdanynt yn eu galar".

Mae'r ymchwiliad ym Malta i'r farwolaeth yn parhau.