Dyn yn gwadu treisio dynes ar fideo yng Nghaerdydd

Liam Stimpson yn cael ei hebrwng i'r llys

Mae dyn sydd wedi'i gyhuddo o dreisio dynes ddwywaith yng nghanol Caerdydd a ffilmio'r ymosodiad ar ei ffôn symudol wedi gwadu'r honiadau.

Dywedodd Liam Stimpson, 24 oed o Gaerdydd, fod y ddynes 40 oed wedi dweud wrtho ei bod hi eisiau "rhyw garw".

Dywedodd wrth y rheithgor yn Llys y Goron Caerdydd ei bod wedi cydsynio i gael rhyw a'i bod wedi gofyn iddo recordio'r digwyddiad fel rhan o chwarae rôl rywiol.

Mae’n gwadu dau gyhuddiad o dreisio - un o wneud i berson gymryd rhan mewn gweithgaredd rywiol heb gysyniad a'r llall o achosi niwed corfforol difrifol yn fwriadol.

Rhybudd: Gallai'r cynnwys beri loes

Wedi'i wisgo mewn siwt las a thei, aeth i'r brifddinas ar Ŵyl San Steffan y llynedd i ddathlu ei ben-blwydd gyda ffrind.

Dywedodd iddo gwrdd â’r ddynes y mae’n ei disgrifio fel “gweithiwr rhyw” wrth iddo gerdded drwy ganol y ddinas yn oriau mân 27 Rhagfyr.

Dywedodd iddi gynnig gweithred ryw iddo mewn lôn oddi ar Heol Eglwys Fair am £20.

Mae Mr Stimpson yn honni bod y ddynes, na ellir ei henwi am resymau cyfreithiol, wedi dwyn £250 oddi arno.

Dywedodd wrth y llys ei bod wedi cydsynio i gael rhyw pellach a cherddodd y pâr o dan y bont reilffordd yn agos at orsaf ganolog y brifddinas.

Mewn cyfres o glipiau fideo a ddangoswyd i'r rheithgor, gellir gweld y ddynes yn noeth. Roedd hi'n gwaedu a'i llygad dde wedi chwyddo - anafiadau a gafodd wedi iddi ddisgyn ar ei ffordd i'r bont, medd Mr Stimpson.

Yn un rhan o'r fideo mae hi i'w gweld yn gwasgu ei dwylo mewn gweddi, mae dagrau'n llifo i lawr ei hwyneb, a gellir ei chlywed yn dweud: "Paid â curo fi, babi, paid â'm curo plis."

Mae Mr Stimpson yn honni eu bod wedi trafod beth fyddai'n digwydd yn y chwarae rôl cyn iddo ddechrau recordio, gan ddweud wrth y llys, "roedd popeth yn gydsyniol".

"Gallai hi fod wedi gadael ar unrhyw adeg o'i hewyllys ei hun," meddai.

Mae’r achos yn parhau.