Cyhuddo dyn o ymosodiad rhywiol ar ferch 11 oed

Fe ddigwyddodd yr ymosodiad honedig ar y ferch 11 oed rhwng Clwb Golff Caerdydd a Ffordd Pentwyn yn ardal Pontprennau

Mae dyn 31 oed o Gaerdydd wedi ymddangos yn y llys wedi ei gyhuddo o ddau drosedd rhywiol yn ymwneud â merched ifanc.

Mae Alexander Dale, o ardal Waunadda'r brifddinas, wedi ei gyhuddo o ymosod yn rhywiol ar ferch 11 oed wrth iddi fynd â'i chi am dro yn ardal Pontprennau ar 25 Hydref.

Mae hefyd yn wynebu cyhuddiad ar wahân o annog plentyn i gymryd rhan mewn gweithred rywiol yn dilyn digwyddiad yn ymwneud â merch 15 oed ar fws rhwng Y Barri a Chaerdydd ar 23 Hydref.

Ni gyflwynodd ble yn ystod y gwrandawiad yn Llys Ynadon Caerdydd ac fe fydd yn ymddangos yn Llys y Goron Caerdydd ar 29 Tachwedd yn dilyn asesiad seiciatryddol llawn.

Oherwydd difrifoldeb y cyhuddiadau, ni chafodd Mr Dale fechnïaeth.