I ble aeth y Cymry? Golwg ar yr holl symud ar ôl i'r ffenestr gau

Mae Lewis Koumas wedi creu argraff ar ddechrau ei gyfnod ar fenthyg yn Stoke

Mae hi wedi bod yn haf prysur arall o ran trosglwyddiadau i glybiau a chwaraewyr pêl-droed Cymru.

Roedd Jordan James, Joe Rodon, Chris Mepham a Kieffer Moore ymhlith rhai o enwau mawr y tîm cenedlaethol a symudodd cyn i'r ffenestr drosglwyddo gau yn hwyr nos Wener.

Bu Caerdydd, Abertawe, Casnewydd a Wrecsam i gyd yn prynu a gwerthu chwaraewyr yn y dyddiau olaf hefyd.

Dyma olwg ar rai o brif straeon y ffenestr drosglwyddo o safbwynt y tîm cenedlaethol a'r clybiau Cymreig ym mhyramid Lloegr.

Mae Joe Rodon wedi ail-ymuno â Leeds United yn y Bencampwriaeth

Y trosglwyddiad mwyaf o ran arian yn ymwneud â chwaraewr o Gymru yr haf hwn oedd symudiad Joe Rodon o Tottenham i Leeds am ffi o thua £10m.

Fe wnaeth amddiffynnwr Cymru dreulio'r tymor diwethaf ar fenthyg yn Elland Road, a dywedodd bod dychwelyd i Sir Efrog, yn barhaol y tro hwn, yn "teimlo'n iawn".

Un arall sydd wedi symud i Sir Efrog yw'r ymosodwr Kieffer Moore - sydd wedi ymuno â Sheffield United o Bournemouth am ffi sydd heb ei ddatgelu.

Er yn cael ei gysylltu â Chaerdydd unwaith eto, mae Moore wedi arwyddo cytundeb tair blynedd gyda'r clwb a ddisgynnodd o'r Uwch Gynghrair y tymor diwethaf.

Mae Chris Mepham hefyd wedi gadael y Cherries, yn symud i Sunderland ar fenthyg am flwyddyn.

Mae'r chwaraewr canol cae ifanc, Jordan James wedi symud o Birmingham City i Rennes yn Ffrainc am tua £4m tra bod Sorba Thomas hefyd wedi symud i glwb yn Ligue 1 - gyda'r asgellwr yn ymuno â Nantes ar fenthyg am flwyddyn.

Mae Tyler Roberts hefyd wedi gadael Birmingham City, yn symud i Northampton Town ar fenthyg am flwyddyn.

Mae Kieffer Moore wedi ymuno â golwr Cymru, Adam Davies (dde) yn Sheffield United

Mae ymosodwr 18 oed Cymru a Lerpwl, Lewis Koumas wedi symud ar fenthyg i Stoke yn y Bencampwriaeth, ac mae eisoes wedi sgorio dwy gôl yn ei bedwar ymddangosiad cyntaf.

Mae un arall o Gymry ifanc Lerpwl, y cefnwr chwith Owen Beck, hefyd wedi ymuno â Blackburn Rovers ar fenthyg am y tymor.

Fe wnaeth cyn-chwaraewr canol cae Lerpwl a Preston North End, Ben Woodburn arwyddo cytundeb dwy flynedd gyda Salford City yn Adran Dau.

Mae James Lawrence wedi symud o FC Nurnberg i Almere City yn yr Iseldiroedd, tra bod Joe Morrell yn dal heb glwb ar ôl i'w gytundeb gyda Portsmouth ddod i ben.

Mae Jesper Daland (dde) wedi arwyddo cytundeb pedair blynedd gyda Chaerdydd

Ar ôl oedi cyn cynnig cytundeb newydd i Erol Bulut ar ddiwedd y tymor diwethaf, mae Caerdydd yn bendant wedi cefnogi eu rheolwr yn ariannol yn ystod yr haf.

Er eu bod wedi gwerthu Mark McGuinness am ffi all godi i thua £10m i Luton Town, mae'r Adar Gleision wedi arwyddo tri amddiffynnwr canol i geisio gwneud yn iawn am y golled honno.

Mae Calum Chambers wedi ymuno o Aston Villa, Will Fish o Manchester United am £1m a Jesper Daland o Cercle Brugge am ffi o £3.5m.

Mae Caerdydd hefyd wedi denu chwaraewr canol cae Awstralia, Alex Robertson o Manchester City am ffi allai godi i £3m, yr asgellwr Chris Willock o Queens Park Rangers a chyn-asgellwr Aston Villa ac Everton, Anwar El Ghazi.

Yn y llinell flaen, mae ymosodwr Y Traeth Ifori, Wilfred Kanga wedi ymuno ar fenthyg o Hertha Berlin, tra bod Roko Simic wedi ei arwyddo o RB Salzburg ac wedi ei anfon ar fenthyg i KV Kortrijk yng Ngwad Belg am y tymor.

Yn ogystal â ffarwelio gyda McGuinness, mae Caerdydd wedi gwerthu'r chwaraewr canol cae, Ebou Adams am ffi sydd heb ei ddatgelu i Derby County.

Mae sawl chwaraewr ifanc wedi mynd allan ar fenthyg hefyd - gyda'r Cymry Kieron Evans ac Eli King yn ymuno â Chasnewydd a Stevenage a brawd Rubin Colwill, Joel, yn mynd i Cheltenham yn Adran Dau.

Mae asgellwr newydd Abertawe, Eom Ji-Sung wedi ennill dau gap i Dde Corea

Roedd rheolwr Abertawe, Luke Williams wedi dweud o'r dechrau mai cryfhau'r ymosod oedd y prif ffocws yr haf hwn.

Mae ymosodwr Slofenia, Zan Vipotnik, wedi arwyddo cytundeb pedair blynedd gyda'r Elyrch ar ôl gadael Bordeaux.

Fe ymunodd yr asgellwr Florian Bianchini o Bastia am ffi o £1.95m, tra bod chwaraewr rhyngwladol De Corea, Eom Ji-Sung, wedi ymuno o Gwangju FC.

Yn oriau olaf y cyfnod trosglwyddo, fe lwyddodd Abertawe i ddenu Myles Peart-Harris o Brentfod - chwaraewr canol cae ymosodol a chwaraeodd bum gwaith i'r tîm yn yr Uwch Gynghrair y llynedd.

Cafodd y chwaraewr canol cae Goncalo Franco ei arwyddo o glwb Moreirense ym Mhortiwgal, tra bod amddiffynnwr tîm dan-20 Lloegr, Neslon Abbey hefyd wedi ymuno ar fenthyg o Olympiakos am y tymor.

O ran ymadawiadau, fe wnaeth Nathan Wood symud i Southampton at gyn-reolwr yr elyrch, Russell Martin, am ffi o tua £3m.

Fe ddaeth cytundeb Jamie Paterson i ben ac mae wedi ymuno â Charlotte FC yn yr Unol Daleithiau ac mae'r ymosodwr Jerry Yates wedi mynd allan ar fenthyg i Derby County am y tymor.

Mae Ollie Rathbone wedi symud o Rotherham i Wrecsam am £500,000

Mae hi wedi bod yn haf gymharol dawel i Wrecsam, gyda Phil Parkinson yn cadw ffydd yn nifer o'r chwaraewyr sydd wedi llwyddo i ennill dyrchafiad ddwywaith yn olynol.

Ddydd Gwener fe arwyddodd y Dreigiau Mo Faal - ymosodwr ifanc o'r Gambia - o West Brom am ffi o dros £500,000.

Fe ymunodd Ollie Rathbone am ffi debyg o Rotherham cyn dechrau'r tymor - chwaraewr canol cae sydd â phrofiad eang o chwarae yn y Bencampwriaeth ac Adran Un.

Mae Callum Burton a Dan Scarr wedi ymuno o Plymouth Argyle yn y Bencampwriaeth, tra bod Lewis Brunt a George Dobson - cyn chwaraewr Charlton Athletic - hefyd wedi ychwanegu dyfnder i'r garfan.

Un o'r trosglwyddiadau pwysicaf i Wrecsam, o bosib, oedd llwyddo i berswadio'r golwr Arthur Okonkwo i ymuno â'r clwb yn barhaol wedi iddo dreulio blwyddyn ar fenthyg yno y tymor diwethaf.

Ymhlith yr enwau cyfarwydd i adael y Cae Ras dros yr haf mae Aaron Hayden, Luke Young, Ben Tozer a Jordan Tunnicliffe.

Mae Courtney Baker-Richardson wedi sgorio dwy gôl mewn tair gêm i'r Alltudion y tymor hwn

Mae hi wedi bod yn haf arall o newid draw yng Nghasnewydd gyda dros 15 o chwaraewyr newydd yn ymuno ar fenthyg neu ar gytundebau llawn - yn ogystal â'r ffaith bod rheolwr newydd wrth y llyw.

Bu'n rhaid i Nelson Jardim, cyn-hyfforddwr gydag Abertawe, ddelio a'r ffaith bod eu prif sgoriwr y tymor diwethaf, Will Evans, wedi gadael am Mansfield am £230,000, tra bod chwaraewyr profiadol eraill fel Joe Day, Omar Bogle a Scott Bennett hefyd wedi gadael Rodney Parade.

Ond mae'r gŵr o Bortiwgal wedi bod yn brysur - mae Courtney Baker-Richardson wedi ail-ymuno a'r clwb o Crewe, Ciaran Brennan o Sheffield Wednesday a Anthony Driscoll-Glennon o Grimsby.

Yn ogystal â hynny mae'r Alltudion wedi denu nifer o chwaraewyr ar fenthyg gan gynnwys Kyle Hudlin o Huddersfield, Jamie Miley o Newcastle a Noah Mawene o Preston.