Tîm Hado Cymru'n edrych ymlaen at y cyfle i 'herio'r goreuon'

Mae Cymru eisoes wedi cystadlu ym Mhencampwriaeth Hado'r Byd yn China

Bydd tîm Hado Cymru yn teithio i Coventry y penwythnos hwn i gystadlu yn y twrnamaint Cenhedloedd Cartref cyntaf erioed.

Yn ôl y 'War Pigs' - enw answyddogol y tîm - fe fydd y gystadleuaeth newydd yn gyfle i "herio'n hunain yn erbyn y goreuon".

Mae Hado yn gamp realiti estynedig (AR) sy'n cyfuno technoleg â symudiadau corfforol.

Mae Prif Swyddog Gweithredu E-Chwaraeon Cymru, Rhys Richardson yn rhan o'r tîm cenedlaethol ar hyn o bryd, ond mae'n gobeithio gweld "y genhedlaeth nesaf yn cymryd eu lle yn y garfan".

Beth yw Hado?

Mae chwaraewyr yn gwisgo penwisgoedd AR ac yn gwneud cyfres o symudiadau corfforol i daflu "peli egni" a chreu tarianau digidol.

Nod y timau yw taro ei gilydd gyda'r peli yn y byd AR - ond does dim peli go iawn yn eu dwylo.

Mae'r tariannau yn cael eu defnyddio i amddiffyn chwaraewyr rhag peli'r gwrthwynebwyr.

80 eiliad yw hyd un gêm ac mae'r gamp yn cael ei gymharu i 'dodgeball rhithiol'.

Mae Ieuan James (chwith) yn chwarae i Gymru ac yn gweithio yn Ysgol Cwm Rhymni

Dywedodd Rhys Richardson nad oedd llawer o ddiddordeb ymysg y cyhoedd pan sefydlwyd y tîm 'nôl yn 2024.

"Mi wnaeth E-Chwaraeon Cymru ddanfon neges i bobl ar draws y wlad yn gofyn pwy fase' hefo diddordeb i chwarae Hado dros Gymru," meddai.

"Ond doedd dim digon o ddiddordeb felly cymerais i'r rôl!"

'Edrych ymlaen at yr her'

Aelod arall o'r garfan yw Ieuan James, sydd hefyd yn gweithio fel aelod o staff cefnogol yn uned ymddygiad Ysgol Gyfun Cwm Rhymni.

Mae Ieuan yn gobeithio gweld y gamp yn tyfu yn sydyn ac mae'n credu y gallai cystadlaethau fel y twrnamaint y penwythnos hwn gyfrannu at hynny.

"Ni'n edrych ymlaen at yr her y penwythnos yma. Bydd goreuon y wlad yno a ni'n gobeithio byddwn yn gallu cystadlu," meddai.

Ond esboniodd nad oes canolfan Hado yng Nghymru ar hyn o bryd, ac o ganlyniad mae'n rhaid iddo ef a'i gyd-chwaraewyr deithio i Coventry - 125 milltir i ffwrdd - bob penwythnos.

Mae Lloyd yn rhan o'r tîm ieuenctid - y 'War Piglets'

Er yn gamp gymharol newydd, mae Hado yn dechrau ymddangos mewn ysgolion ac yn denu dilyniant ymhlith pobl ifanc ledled y wlad.

Yn Ysgol Gyfun Cwm Rhymni mae nifer o ddisgyblion wedi bod yn datblygu eu sgiliau gyda'r tîm ieuenctid - y 'War Piglets'.

Mae'r ysgol bellach yn gobeithio y gallai llwyddiant Cymru ar y llwyfan rhyngwladol ddenu mwy o bobl i chwarae'r gamp.

Mae Lloyd, sydd yn ddisgybl yn Ysgol Gyfun Cwm Rhymni, newydd ddechrau chwarae Hado ac yn meddwl fod y syniad o gyfuno gemau cyfrifiadurol a chwaraeon yn "rili cŵl".

Yn frawd iau i Ieuan James, mae wedi mwynhau cael ei gyflwyno i'r gamp gan ei frawd.

"Doeddwn i ddim yn hollol siŵr beth oedd e. Pan ges i'r neges yn dweud fy mod yn mynd i chwarae Hado doeddwn i ddim yn siŵr beth i ddisgwyl," meddai.

Bydd Cymru'n wynebu Lloegr a thimau eraill o'r cenhedloedd cartref yn Coventry ddydd Sul.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.