Mì-chinnt fhathast mu leabharlann Thiriodh

Tha muinntir Thiriodh fhathast mì-chinnteach dè tha an dàn don leabharlann aca an dèidh mar a chaidh planaichean airson ceithir leabharlannan ann an Earra-Ghàidheal is Bòd a dhùnadh a tharraing.

Dh'fhàg a' bhuidheann charthannais Live Argyll, a tha a' ruith leabharlannan às leth Comhairle Earra-Ghàidheal is Bhòid, na ceithir leabharlannan - ann an Tiriodh, Càrdanros, Tairbeart Loch Fìn agus Ros Neimhidh - a-mach às na planaichean ionmhais aca airson an dà bhliadhna a tha romhainn.

Dh'fhàg sin gun robh dragh gun deadh an dùnadh.

Tha daoine anns na ceithir coimhearsnachdan air cur an aghaidh dùnadh nan leabharlannan, le athchuing ag amas air tè Ros Neimhidh a ghlèidheadh air cha mhòr 700 ainm fhaighinn.

A-niste, thuirt a' Chomhairle gun deach innse dhaibh le Live Argyll nach eil iad a-niste an dùil an dùnadh.

Chan eil leabharlann Thiriodh air a bhith fosgailte bhon t-Samhain an-uiridh, dar a dh'fhàg an leabharlannaiche an dreuchd.

Conaltradh

Tha Fear-Gairm Comhairle Coimhearsnachd Thiriodh, Gerard McGoogan, ag ràdh nach deach conaltradh sam bith a dhèanamh leotha mar a chaidh a ghealltainn.

"Tha iad a' dearmad na gheall iad," thuirt e.

"Gheall iad gum biodh dusan seachdain de chonaltradh ann, 's cha do rinn iad dad.

"An t-seachdain a chaidh chuir iad a-mach suirbhidh airson leabharlannan Càrdanros agus an Tairbeirt mun dùnadh, 's gu h-obann an t-seachdain seo tha a h-uile rud glan.

"Airson an fhìrinn innse, chan eil sinn buileach soilleir dè tha iad air fhoillseachadh, oir cha do dh'innis duine dhuinn. Chan fhaca sinn dad oifigeil.

"Tha an leabharlann againne air a bhith dùinte bhon t-Samhain an-uiridh.

"A bheil an naidheachd seo a' ciallachadh gum fosgail iad an dà leabharlann seo a-rithist? No an e dìreach nach dùin iad buileach iad?"

Chaidh beachd iarraidh air Live Argyll.