Fàilte le faiceall air gealltanas hub Bharraigh is Bhatarsaigh

Leanaidh dragh ann am Barraigh mu na goireasan ùra slàinte agus foghlaim dhan eilean gus an tèid a' chiad spaid dhan talamh, a rèir cheannard Buidheann Dealbhachaidh Ionadail Barraigh 's Bhatarsaigh airson Slàinte agus Cùraim Shòisealta.

Tha fàilte air an naidheachd bho Riaghaltas na h-Alba ge-tà, gu bheil iad a' gealltainn gun tachair am pròiseact, agus iad gu bhith ag obair gus a thoirt gu buil.

Tha tomhas de dh'fhaiceall an lùib an dòchais aca cuideachd ge-tà, le cho fada 's a tha iad air a bhith a' feitheamh.

"Thug e togail mhòr dhan a h-uile duine," thuirt Ceannard na buidhne Maighread Anna Beggs.

"T-sàilleibh tha sinn a' faireachdainn gu bheil sinn air sabaid airson ùine mhòir, agus seo co-dhiù an treasamh, mura h-e an ceathramh triop againn rudan a chluinntinn mu dheidhinn seo.

"Tha sinn an dòchas gum faigh sinn e an triop seo, t-sàilleibh tha seo cho riatanach.

"A h-uile pìos dheth - an sgoil, an t-ospadal agus an t-àite airson nan seann daoine.

"Tha sinn cho dòchasach 's as urrainn a bhith, agus tha sinn dìreach a' smaoineachadh 'chan urrainn dhaibh a thoirt bhuainn a-rithist'."

Le taghadh gu bhith ann airson Pàrlamaid na h-Alba an ceann bliadhna ge-tà, tha ceist fhathast air a' bhuidhinn an tachair e.

"Tha an t-eagal sin oirnn," thuirt Ms Beggs.

"Gus an tèid a' chiad spaid dhan talamh air a' phròiseact sin bidh an t-eagal oirnn."