Chaidh cur às do leasachadh Sràid na h-Acadamaidh an Inbhir Nis

Fo na molaidhean a bh' ann, dheadh càraichean a chasg bhon t-sràid

Chaidh cur às do phlanaichean gus obair-leasachaidh a dhèanamh air Sràid na h-Acadamaidh ann an Inbhir Nis, aig coinneimh de Chomhairle na Gàidhealtachd.

Dh’aontaich comhairlichean gun a dhol air adhart leis na planaichean tuilleadh.

Bhathas a' dol a chur casg air càraichean air an t-sràid - tè de na sràidean as trainge sa bhaile - agus an t-sràid air a chomharrachadh mar an tè as miosa an Alba airson truailleadh adhair.

Ach thog mòran ghnothachasan an guthan an aghaidh a' phlana, 's dragh ann mun bhuaidh a bheireadh na planaichean orra.

"Plana-gnìomha"

Thuirt Ionad an Eastgate, a bha am measg na bha air cur an agaidh an leasachaidh, gu bheil iad "taingeil gu bheil beachdan ciallach air soirbheachadh".

Dh'innis iad ge-tà, gur e briseadh-dùil a th' ann gun deach an sgeama a thilgeil às gu tur, is iad ag ràdh gu bheil feum air piseach a thoirt air Sràid na h-Acadamaidh.

Thuirt iad gum faodadh an sgeama mar a bha air sgrios a dhèanamh air gnothachasan.

Tha iad ag ràdh gum bu chòir do Chomhairle na Gàidhealtachd a-nise tighinn air adhart le plana-gnìomha do mheadhan Inbhir Nis air fad.