Mì-thoileachas an Slèite nach deach innse gum bi oighreachd air a reic

Tha dragh ann an Slèite leis an naidheachd gu bheil tè de na h-oighreachdan as motha san Eilean Sgitheanach, air a bheil fearann eachdraidheil Chlann Dòmhnaill agus seann chaisteal a' chinn-fheadhna, gu bhith air a reic.

Thuirt an cathrannas dham buin i gur e "co-dhùnadh duilich" a bh' ann dhaibh Caisteal Armadail agus an oighreachd sa bheil 20,00 acair a chur air a' mhargaidh air sgàth thrioblaidean ionmhais.

Thuirt Urras Fearainn Chlann Dòmhnaill gum biodh iad ag amas air grantaichean a thoirt do "phròiseactan cinnidh agus dualchais Ghàidhealaich".

Tha cuid de mhuinntir Shlèite diombach ge-tà leis nach deach bruidhinn ris a' choimhearsnachd ro làimh.

Thuirt an Dr Andy Williamson nach deach innse dhan choimhearsnachd gun robhar an dùil an oighreachd a chur air a' mhargaidh

Thuirt cathraiche Comhairle Coimhearsnachd Shlèite, an Dr Andy Williamson, nach do chuir an dìth chonaltraidh "cus ìongnaidh" air.

"Chan eil na h-urrasairean sa choimhearsnachd. Tha iad ann an Lunnainn agus na Stàitean Aonaichte," thuirt e.

Thuirt an Dr Williamson gum faodadh gum fàg nach eil ceangal eadar iad agus an fheadhainn dham buin an talamh nach bi buannachd sam bith dhan choimhearsnachd nuair a thèid an oighreachd a reic.

"Tha eagal oirnn gum bi i air a briseadh an-àirde. Tha dragh oirnn gum bi daoine airson a ceannach airson crainn-gaoithe a thogail," thuirt e.

"Dè a' bhuannachd a bhiodh an cois sin dhan choimhearsnachd? Dè am fèum a dhèanadh sin do mhuinntir Shlèite agus an Eilein Sgitheanaich?"

"'S e seo an talamh againne"

Thàinig an naidheachd am bàrr là ro dheasbad aig Holyrood air Bile Ath-leaschaidh an Fhearainn.

Thathar a' moladh riaghailtean ùra fom biodh dleasdanas air uachdarain innse do choimhearsnachdan mus foillsich iad planaichean pìosan mòra fearainn a reic.

Thuirt an Dr Williamson gu bheil an suidheachadh ann an Slèite a' dearbhadh gu bheil tuilleadh leasachaidh a dhìth air laghan fearainn.

"Tha e a' dol air a' mhargaidh Diaordaoin agus 's e Dimàirt a th' ann an-diugh. Mar sin, ciamar a thèid againn air an airgead a dh'fheumar a thogail? Chan eil càil a dh'fhios againn dè a' phrìs a bhios iad ag iarraidh.

"Chan ann mu dheidhinn oighreachd a tha seo, 's ann mu dheidhinn far a bheil sinn a' fuireach. 'S e seo an talamh againne," thuirt e.

Tha tobhta Chaisteal Armadail, dachaigh eachdraidheil cheann-feadhna Chlann Dòmhnaill, am measg na thèid a reic

Chaidh Urras Fearainn Chlann Dòmhnaill a stèidheachadh bho chionn còrr is 50 bliadhna.

Thuirt na h-urrasairean gun robh na cosgaisean airson Caisteal Armadail a ruith agus a chumail air sìor èirigh.

Chaidh innse do luchd-turais nach bu chòir gum bi cus buaidh air co-dhùnadh an urrais air seasan na turasachd 2025.

Chan eil fhios dè tha an dàn dhaibhsan a tha ag obair san ionad-tadhail agus air an oighreachd.

Tha am BBC air beachd iarraidh bho Àrd-oifigear Urras Fearainn Chlann Dòmhnaill.