Tha dùil ri 20,000 aig an 21mh Fèis Bhelladrum Tartan Heart

Nochd Natasha Bedingfield air prìomh àrd-ùrlar Bhelladrum oidhche 'Ardaoin

Thòisich an 21mh Fèis Bhelladrum Tartan Heart Diaordaoin faisg air a' Mhanachainn, agus dùil ri 20,000 thairis air trì latha.

'S e an còmhlan ionadail Falasgair a dh'fhosgail an fhèis air a' phrìomh àrd-ùrlar. Bhuannaich iadsan farpais a' BhBC airson an tachartas ciùil as motha air a' Ghàidhealtachd fhaighinn gu dol.

Bha Natasha Bedingfield agus Paul Heaton cuideachd air a' phrìomh àrd-ùrlar Diardaoin.

Dihaoine bidh Supergrass and CMAT - a bha aig Glastonbury na bu thràithe air an t-samhradh - am measg nan rionnagan mòra, cho math ri Skippinish, Karine Polwart agus Gok Wan aig am bi seata DJ.

Tha ùidh mhòr aig Heaton, a tha a' leantainn Sheffield United, am ball-coise agus thadhail e air pàircean Chaledonian Thistle Inbhir Nis agus cluba Lìg na Gàidhealtachd Clach na Cùdainn mus deach e gu Belladrum.

Thadhail Paul Heaton air pàircean ball-coise an Inbhir Nis mus deach e gu Bella

Gu math tric, tha deagh shìde ann aig àm na fèise, ach bha smugraich uisge air a' chiad là mus tàinig turadh feasgar.

Am measg nan ceòladairean a nochdas Dihaoine bidh Katie Gregson-NicLeòid à Inbhir Nis.

Ann an 2022, nuair a bha i na h-oileanach agus ag obair ann an cafè, choisinn an seinneadair cliù an dèidh dhi bhideo 45 diog a chraoladh air TikTok.

Fhuair an t-òran aice Complex 100,000 sealladh ann an aon oidhche.

Cuideachd a' nochdadh air an dàrna latha bidh am fear-ciùil RuMac à Ulapul, a tha a' nochdadh san fhilm ùr aig Danny Boyle 28 Years Later agus a ràinig iar-chuairt dheireannach a' phrògram TV, Britain's Got Talent.

Tha BBC ALBA a' craoladh beò às an làraich agus bidh an luchd-ciùil a nochd cuideachd ri fhaicinn air an iPlayer thairis air an deireadh-sheachdain.