Tagraidhean gan sireadh do dh'fharpaisean a' Mhòid an Loch Abar

Tha tagraidhean gan sireadh airson fharpaisean a' Mhòid Nàiseanta Rìoghail, a thèid a chumail ann an Loch Abar am-bliadhna.

Tha an fheadhainn a tha an urra ris an fhèis mhor, bhliadhnail ag iarraidh air a h-uile duine a tha airson pàirt a ghabhail anns na farpaisean, a thèid a chumail eadar 10mh is 18mh An Dàmhair, na tagraidhean aca a chur a-steach.

Chaidh fhoillseachadh sa Chèitean 2023 gum biodh am Mòd a' tilleadh a Loch Abar ann an 2025.

Seo an naoidheamh turas a tha am Mòd Nàiseanta Rìoghail air tadhal air Loch Abar, agus tha ochd bliadhna ann bhon a chaidh a chumail anns an sgìre sin mu dheireadh.

Feumaidh daoine na tagraidhean aca a chur a-steach ro dheireadh an là, Disathairne 31mh an Cèitean.

Faodaidh daoine tagraidhean a chur a-steach an seo.

Thuirt Seumas Greumach, Àrd-oifigear a' Chomuinn Ghàidhealaich: "Chunnaic sinn na mìltean aig farpaisean Mòd na bliadhna an-uiridh, a' cur ri leasachadh na Gàidhlig an Alba agus a' comharrachadh ar cìuil is ar cultair.

"Tha na farpaisean aig cridhe an tachartais agus tha e tlachdmhor fhaicinn an dàimh, pròis agus an coimhearsnachd am measg nam farpaiseach.

"Ged a bhiodh tu air a bhith an sàs aig iomadach Mòd no a' tòiseachadh as ùr, mholainn gun dèan thu iarrtas agus a dhol an sàs san tachartas mhòr Albannach seo.

"Tha fhios gum faigh sinn deagh aoigheachd ann an Loch Abar agus tha sinn air bhioran Am Mòd a thoirt air ais a-rithist san Dàmhair", thuirt Mgr Greumach.

Chaidh còrr is 200 farpais a chumail aig Mòd an Òbain an-uiridh, anns an robh còrr is 2,700 farpaisich a' gabhail pàirt.

Thuirt an Comunn Gàidhealach gur e Mòd an Òbain an tachartas as motha a tha air a bhith aca ann an còig bliadhna agus gu bheil iad an dòchas gun lean sin am-bliadhna.

Tha farsaingeachd de dh'fharpaisean gan cumail ann an Loch Abar, eadar seinn, còisearan, an fhidheall, bàrdachd, còmhlain is eile.

Thuirt Cathraiche Comataidh Gàidhlig Chomhairle na Gàidhealtachd, an Comh. Calum Rothach gu bheil an t-ùghdarras ionadail leth toilichte gu bheil am Mòd a' tilleadh a Loch Abar.

"A bharrachd air na farpaisean, tha am Mòd a' toirt cothrom cudromach do luchd-labhairt de dhiofar chomasan a' Ghàidhlig a chleachdadh gu neo-fhoirmeil tron tachartas agus cuiridh seo gu mòr ri beòthalachd shòisealta, eaconamach is chultarach coimhearsnachd Loch Abar", thuirt e.