£20m gus mòintichean ath-stèidheachadh

Obair ath-stèidheachaidh na mòintich aig Tuath Armadail ann an Gallaibh

Thèid obair ùrachaidh a dhèanamh air 12,000 heactair de thalamh mhòintich millte air feadh Alba thairis air an ath thrì bliadhna.

Tha NatureScot le maoin luach £20m a phàigheas airson a' mhòinteach ann an 64 làraichean ath-shlànachadh.

'S e am maoineachadh as motha a-riamh airson an leithid de phròiseactan.

Cumaidh an sgeama Peatland ACTION aca taic ri 400 obair sa roinn ann an 2025/26 a rèir na buidhne riaghaltais.

Obair ath-stèidheachaidh na mòintich a' dol air Oighreachd Lus

Bho 1990 chaidh obair ùrachaidh a dhèanamh air còrr is 90,000 heactair de thalamh mhòintich a chaidh a mhilleadh le drèanadh, coilltearachd agus cus ionaltraidh thar nam bliadhnaichean.

'S e mòintichean fallainn an dòigh as fheàrr san t-saoghal airson carbon a stòradh.

Ged nach eil iad ach air 3% de dh'uachdar na talmhainn tha iad a' stòradh a dhà uimhir de charbon na tha coilltean an t-saoghail.

'S e obair chudromach a th' ann airson dèiligeadh ri èiginn na gnàth-shìde agus na bith-iomadachd.

Tha mòintichean an t-saoghail a' stòradh a dhà uimhir de charbon na tha craobhan

Gheall Riaghaltas na h-Alba gun cosg iad £250m airson 250,000 heactair de thalamh mhòintich ath-stèidheachadh ro 2030.

Thuirt Claudia Rowse, Leas-stiùiriche NatureScot: "'S e an rud as fheàrr mu bhith ag ùrachadh talamh mòintich gu bheil e gu buannachd a h-uile duine.

"Chan e a-mhàin gu bheil e math dhan àrainneachd agus airson a bhith a' strì ri atharrachadh na h-aimsire ach tha obair an cois na h-obrach, gu math tric ann an sgìrean dùthchail iomallach."

Gheibhear barrachd fiosrachaidh mun obair an seo.