Dùil gun tòisich obair air sganair MRI nan Eilean Siar as t-fhoghar

Tha NHS nan Eilean Siar ag ràdh gu bheil iad an dùil gun tòisich cùmhnantair air obair ullachaidh mu choinneamh sganair MRI anns na h-eileanan as t-fhoghar.

Thuirt a' bhuidheann gu bheil iad air adhartas a dhèanamh leis a' phròiseact, leis an amas gun tèid an t-seirbheis a chur air bhonn as t-samhradh 2026.

A bharrachd air an obair-dealbhachaidh, tha NHS nan Eilean Siar ag ràdh gu bheil iad cuideachd air a bhith ag obair gus uidheamachd a cheannach agus planadh a dhèanamh mu choinneamh luchd-obrach.

Leig am bòrd-slàinte fhaicinn san Dàmhair 2023 gun robh iad am beachd sganair den t-seòrsa seo a stèideachadh anns na h-Eileanan an Iar.

Tha dùil gun toir sganair anns an sgìre fhèin cruth-atharrachadh air an dòigh anns a bheil seirbheisean gan toirt seachad do dh'euslaintich anns na h-eileanan.

Dh'iarr NHS nan Eilean Siar cead-dealbhachaidh airson leudachadh a thoirt air Ospadal nan Eilean mu choinneamh nan leasachaidhean seo sa Ghiblean am-bliadhna.

Bidh am pròiseact a' ruith thairis air dà ìre, a' chiad phàirt airson an làrach ullachadh le luchd-togail, agus an uair sin an sganair agus an uidheamachd a cheannach agus a bhith air a chur an sàs le sgioba sònraichte.

Dreuchdan

Thuirt NHS nan Eilean Siar gu bheil iad air clach-mhìle chudromach a ruighinnn mar-thà, 's iad air Àrd Rèidio-ghrafaiche a thaghadh, a bhios a' tòiseachadh anns an dreuchd san t-Samhain am-bliadhna.

Bidh a' bhuidheann cuideachd an dùil barrachd luchd-obrach co-cheangailte ris a' phròiseact fhastadh agus a chur nan dreuchdan mus tòisich an t-seirbheis.

Tha dùil gun tòisich obair air an làraich as t-fhoghar agus gum mair an obair sin sia mìosan.

Thuirt Àrd-oifigear NHS nan Eilean Siar, Gòrdan Jamieson: "Tha sinn gu math moiteil às an fharsaingeachd de sheirbheisean a tha sinn a' lìbhrigeadh do na coimhearsnachdan againn agus cho math 's a tha iad.

"'S e leasachadh clionaigeach air leth cudromach a bhios ann do dh'euslaintich, do luchd-obrach agus dhan phoball nuair a bhios comas againn sganaichean MRI a dhèanamh ann an seo fhèin sna h-Eileanan Siar.

"Tha fios agam gun cuir luchd-obrach clionaigeach fàilte air a' ghoireas diagnosach a bharrachd a tha seo. Tha mi a' toirt taing dhan a h-uile duine airson an cuid obrach agus tha mi a' gabhail fadachd ris an fhosgladh", thuirt e.