Ceist mu an tig piseach air seirbheis mhàthaireil Ghallaibh an dèidh turas ministeir riaghaltais

Thuirt Ministear Slàinte nam Ban gum feumar dèanamh cinnteach gu bheil an t-seirbheis mhàthaireil an Gallaibh "sàbhailte agus sesamhach" an dèidh coinneachadh ri luchd-iomairt slàinte san sgìre.

Bha Jenni Minto a' tadhail air Ospadal Ghallaibh ann an Inbhir Ùige Diciadain far an cuala i dragh mun t-seirbheis do bhoireannaich leatromach.

Ann an 2016 chaidh an t-seirbheis mhàthaireil ann a ghearradh air adhbharan sàbhailteachd, agus tha mnathan-glùine a-nis ga ruith seach dotairean.

Tha 90% de bhoireannaich bhon fhìor cheann a tuath a-nis a' siubhal a dh'Ospadal an Ràthaig Mhòir an Inbhir Nis airson leanabh a bhith aca, turas còrr is 100 mìle air rathad an A9.

Tha luchd-strì airson seirbheis mhàthaireil le dotairean os a cionn ath-stèidheachadh.

Tha BP na sgìre, Jamie Stone, an dòchas gun tig gluasad às a' choinneimh a bh' aca le Ministear nam Ban.

Thuirt e: "Feumaidh sinn an ìre de sheirbheis a bh' againn ro 2016 fhaighinn air ais agus gum bi a' chuid as motha de leanabain gam breith an seo an Gallaibh, far am bi a' mhàthair le càirdean agus caraidean timcheall oirre agus gun a bhith fada air falbh an Inbhir Nis."

Ge-tà, an dèidh coinneachadh ri Ms Minito thuirt an luchd-iomairt a tha ag iarraidh piseach air an t-seirbheis gun robh iad teagmhach an tigeadh atharrachadh susbainteach às.

Tha Ron Gunn, a tha na chathraiche air Buidheann-Ghnìomha Slàinte Ghallaibh, ag ràdh nach eil an turas dhan Ràthaig Mhòir sàbhailte do bhoireannaich a tha an impis leanabh a bhith aca.

"Thàinig grunn leanaban dhan t-saoghal san aimbealans aig oir an rathaid agus san Ionad A&E. Gu taingeil, chaidh gu math leotha ach dè cho fada 's a leanas sin?"

Thuirt NHS na Gàidhealtachd gu bheil iad ag obair airson seirbheisean màthaireil ann an Gallaibh a dhèanamh cho math 's a ghabhas, 's gu bheil ceannard Cùraim Bheanas-glùine air fhastadh airson leasachaidhean a thoirt air adhart.