Dachaigh-cùraim Moss Park air a gabhail thairis

Dh'innis NHS na Gàidhealtachd agus Comhairle na Gàidhealtachd gu bheil iad air Dachaigh-cùraim Moss Park ann an Loch Abar a ghabhail thairis a-nis.

San t-Sultain an-uiridh, dh'innis a' chompanaidh HC-One, a th' air a bhith a' ruith na dachaigh-cùraim, gun robh iad am beachd a dùnadh.

Chuir sin fearg air gu leòr, le cuid ag ràdh gum feumadh iad an luchd-dàimh a thoirt dhachaigh nan dùnadh Moss Park.

Tha 39 leapannan san dachaigh, agus còrr air 40 duine ag obair ann.

Thuirt NHS na Gàidhealtachd agus Comhairle na Gàidhealtachd gu bheil gach cùmhnant airson leantainn le cùram aig Moss Park ann an òrdugh agus gu bheil an t-seirbheis a-nis an urra ri NHS na Gàidhealtachd.

Thuirt Pamela Stott, an t-Àrd-Oifigear airson Com-pàirteachas Slàinte is Cùram Sòisealta na Gàidhealtachd, gu bheil iad ag aithneachadh gur e àm duilich a bha seo do luchd-còmhnaidh, càirdean agus luchd-obrach agus gu bheil iad toilichte gun lean cùram anns an dachaigh.

Chuir a' chomhairle fàilte air an naidheachd cuideachd.

Thuirt an Comh. Daibhidh Friseal, Cathraiche Comataidh na Slàinte, gum bu chaomh leis taing a thoirt dhan a h-uile duine a chur taic ris an obair seo.

Tha seo a' tighinn is BP Gàidhealach ag ràdh gu bheil cùram sòisealta air a' Ghàidhealtachd ann an èiginn is gum bu chòir do Riaghaltas na h-Alba £60m a chosg air ceithir dachaighean-cùraim ùra san sgìre.

Dh'iarradh an Lib Deamach Aonghas Dòmhnallach dachaighean ùra a stèidheachadh ann am Port Rìgh, Ulapul, Cille Chuimein, agus anns a' Ghearasdan.