£60m is dachaighean-cùraim ùra gan iàrraidh 'son dèiligeadh ri "èiginn a' chùraim"

Luchd-iomairt a' togail fianais mu Moss Park an-uiridh

Tha BP Gàidhealach ag ràdh gu bheil cùram sòisealta air a' Ghàidhealtachd ann an èiginn is gum bu chòir do Riaghaltas na h-Alba £60m a chosg air ceithir dachaighean-cùraim ùra san sgìre.

Tha an Lib Deamach Aonghas Dòmhnallach airson is gun tèid dachaighean ùra a stèidheachadh ann am Port Rìgh, Ullapul, Cille Chuimein, is sa Ghearasdan.

Thuirt BP Inbhir Nis, an Eilein Sgitheanaich is Taobh Siar Rois gun do thòisich e rannsachadh air cùram aig tuath an-uiridh às dèidh nar a chuir "àireamhan fìor mhòr" de dhaoine fios thuige is dragh orra gun rachadh dachaigh-cùraim Moss Park sa Ghearasdan a dhùnadh.

Dh'innis a' chompanaidh HC-One san t-Sultain gun dùineadh Moss Park is Blàr Buidhe ann an Steòrnabhagh.

Thuirt Mgr Dòmhnallach aig an àm sin gun robh seirbheisean cùraim air a' Ghàidhealtachd "ann an èiginn agus a' dol am miosad".

Air a' cheann thall chaidh Moss Park a ghlèidheadh is NHS na Gàidhealtachd is Comhairle na Gàidhealtachd air a ghabhail thairis.

Tha Mgr Dòmhnallach ag ràdh gu bheil an aithisg aige air sealltainn gun do thuit an àireamh de dhachaighean-cùraim do sheann daoine air a' Ghàidhealtachd 18% san deich bliadhna mu dheireadh, ged a dh'èirich an cuibhreann den t-sluagh a tha 75 no nas sine 72% eadar 2001 is 2023.

Thuirt e gu bheil feum air "smaoineachadh às ùr air mar a tha sinn a' cumail taic ri seann daoine".

Thuirt e cuideachd gun do dh'innis feadhainn sa ghnìomhachas gu bheil tuarastal ìosal is gainnead de thaighean aig prìs reusanta ann an sgìrean dùthchail a' fàgail gu bheil e doirbh luchd-obrach gu leòr fhastadh.

Thog luchd-obrach fhèin draghan cuideachd mun uallach a th' orra.

Tha Mgr Dòmhnallach ag iarraidh air Riaghaltas na h-Alba £60m a chosg air dachaighean-cùraim ùra ann am Port Rìgh, Ullapul, Cille Chuimein is sa Gearasdan.

Bhiodh 240 leabaidh an cois nan leasachaidhean seo, tha e ag ràdh, agus àitichean-fuirich do luchd-obrach.

"Chan urrainn dha cùisean leantainn mar a tha iad," thuirt Aonghas Dòmhnallach.

"Tha an sluagh a' fàs nas sine ach tha an àireamh de dhachaighean a' tuiteam is an fheadhainn a tha air fhàgail a' dèiligeadh ri gainnead de luchd-obrach is cosgaisean a tha a' sìor èirigh.

"Tha seo ga fhàgail cianail doirbh do dhaoine cùram fhaighinn faisg air an taigh agus a' cur ris an uallach air ospadalan."

Thuirt Riaghaltas na h-Alba gu bheil iad ag aithneachadh na h-obrach riatanaich a bhios luchd-obrach cùraim shòisealta a' dèanamh air Ghàidhealtachd agus air feadh na dùthcha.

Tha dragh orra, thuirt iad, mun bhuaidh a bheir àrdachadh anns na dh'fheumas luchd-fastaidh a phàigheadh ann an Àrachas Nàiseanta às leth an luchd-obrach air dachaighean-cùraim agus seirbheisean cùraim aig an taigh.

Tha dùil aca, tha iad ag ràdh, gun cuir an co-dhùnadh sin cosgais £95m a bharrachd air roinn a' chùraim shòisealta.

"Tha am buidseat againn airson 2025/26 a' toirt seachad £125m a bharrachd airson dèanamh cinnteach gum faigh luchd-obrach a tha a' toirt seachad cùraim ann an seirbheisean a chaidh a choimiseanadh co-dhiù £12.60 san uair, a rèir an Tuarastail Bith-beò Dha-rìribh," thuirt labhraiche.

"Tha seo a' toirt na tha sinn a' cur ri leasachadh a thoirt air pàigheadh ann an cùram sòisealta gu £950m."