Beàrn cha mhòr £29m am buidseat Chomhairle Earra-Ghàidheal is Bhòid

Tha Comhairle Earra-Ghàidheal is Bhòid ri moladh airson nan sàbhalaidhean a rinn iad ach tha oidhirp a bharrachd a dhìth gus beàrn ionmais faisg air £29m thairis air an ath chòig bliadhna a lìonadh, a rèir aithisg ùr Choimisean nan Cunntasan.

Fhuair an aithisg gun tàinig piseach air grunn sheirbheisean, nam measg seirbheisean cultair agus chur-seachadan, ach gun robh cuid a' dol am miosad, mar sheirbheisean chloinne, slàinte inbheach agus obair shòisealta.

Rinn an aithisg iomradh air ceannas ùr na Comhairle agus am plana corporra ùr ris an deach aontachadh.

'S e plana a tha seo, thuirt an Coimisean, sa bheil leasanan do dh'ùghdarrasan ionadail eile.

Fhuair an Coimisean gu bheil 16% de luchd-obrach na Comhairle bho bhuidhnean-fastaidh agus air cùmhnantan goirid, agus gun robh seo cosgail dhaibh agus a' toirt droch bhuaidh air seirbheisean.

Ge-tà, rinneadh moladh air oidhirpean na Comhairle dèiligeadh ris na duilgheadasan fastaidh agus ann a bhith a' glèidheadh luchd-obrach.

Mhol an Coimisean gun èist an t-ùghdarras ionadail ri beachdan nan coimhearsnachdan nuair a thig e gu bhith a' leasachadh agus ag atharrachadh mar a tha seirbheisean gan lìbhrigeadh.

Thuirt Anndra Burns, Leas-Chathraiche Choimisean nan Cunntasan: "An iomadach seagh, 's e comhairle a tha seo a tha air thoiseach air càch san dòigh sa bheil iad a' cleachdadh teicneòlais dhidseataich airson seirbheisean a lìbhrigeadh do na coimhearsnachdan dùthchail agus eileanach aca.

"Tha planaichean aig a' Chomhairle air mar a ghabhas leasachadh a thoirt air seirbheisean agus luchd-obrach a bhith aca a dhèiligeas ri feumalachdan an ama ri teachd.

"'S e ro-innleachd a th' ann a bu chòir sealltainn do chomhairlean eile.

"Feumaidh iad ge-tà, barrachd a dhèanamh airson atharrachadh a thoirt air lìbhrigeadh sheirbheisean airson an cur air bun-stèidh ionmhais nas seasmhaiche," thuirt e.

Gheibhear an làn-aithisg an seo.