Taic am prionnsabal do Bhile ùr an Fhearainn

Chuir Pàrlamaid na h-Alba taic ann am prionnsabal ri Bile ùr Ath-leasachaidh an Fhearainn a bheireadh cumhachdan ùra do choimhearsnachdan fearann a cheannach.

Bhòt 91 airson na bile, 29 na h-aghaidh, le naoinear bhall gun bhòtadh.

Thugadh taic dhan bhile a dh'aindeoin càinidh bho dhùbhlanaich agus eòlaichean air ath-leasachadh fearainn nach dèan a' bhile mar a tha e an-dràsta gu leòr gus an t-amas a chur an gnìomh.

"Tha 421 uachdaran le sealbh air 50% air na tha de dh'fhearann phrìobhaideach dhùthchail ann an Alba," thuirt Rùnaire nan Cùisean Dùthchail, Net Zero agus nan Eilean, Màiri Gougeon, agus i a' mìneachadh carson a tha bile ùr a dhìth.

"Tha sin neo-àbhaisteach an taca ris an Roinn Eòrpa, far a bheil e na àbhaist gum bi fada a bharrachd dhaoine le sealbh air fearann.

"Feumaidh fearann na h-Alba a bhith mar mhaoin a chùm buannachd na mòr-chuid, seach a' bheag-chuid."

Thog Ms Gougeon air mar a chaidh innse Dimàirt gu bheil oighreachd Urras Fearainn Chlann Dòmhnaill ann an Slèite ga reic mar eisimpleir air far an dèanadh a' bhile ùr feum do choimhearsnachdan.

Thuirt i, nam biodh a' bhile seo air a bhith na lagh mar thà, gur dòcha gun robh cothrom aig a' choimhearsnachd ùidh a nochdadh ann a bhith a' ceannach na h-oighreachd mus deach a cur air a' mhargaidh.

Bheir a' bhile còraichean ùra do luchd-màil, agus dleastanasan ùra do dh'uachdarain.

Fon bhile, bidh aig uachdarain le còrr is 3,000 heactair ri plana manaidsearachd shoilleir a bhith aca, agus conaltradh a dhèanamh ris a' choimhearsnachd ach an gabh an guthansan a chluinntinn mu na mhiannaicheadh iadsan a thachradh leis an fhearann sin.

Ach tha cuid air teagamhan a thogail mun bhile.

"Chan urrainn dhomh a chur an cèill an t-uabhas iomlan a tha mi a' gabhail ron bhile seo," thuirt am BPA Tòraidheach, Tim Eagle, a' bruidhinn san deasbad feasgar.

"Anns a' bhliadhna tha mi air a bhith an seo 's e seo a' bhile as miosa a chunnaic mi, air trì prìomh adhbharan.

"Chan eil mi ag aontachadh ri prionnsabal na tha a' bhile seo a' feuchainn ri dhèanamh.

"Tha a' bhile do-obraichte sa chruth a th' air an-dràsta, agus dh'fhaodadh buille laghail na bile a bhith gu math farsainn 's gun tig dùbhlain mu choinneimh san àm ri teachd."

Seasmhachd na Gàidhlig

Tha na Làbaraich an dùil bhòtadh leis an Riaghaltas, ach thuirt an Làbarach Rhoda Ghrannd gum bu chòir dhan bhile a bhith nas adhartaiche.

"Cha toir a' bhile mar a tha e atharrachadh air pàtran seilbhe an fhearainn," thuirt i.

"Cha mhotha a dhèiligeas e ris a' chumhachd a th' aig uachdarain coimhearsnachdan a chumail ri èirig."

"Tha buille aige seo air toirt seachad sheirbheisean, beartas nàiseanta agus coimhearsnachd, agus seasmhachd na Gàidhlig fhèin."

B' e deasbad Diciadain a' chiad fhear a thèid a chumail air a' bhile, agus an sgrùdadh gus leantainn anns na seachdainean a tha romhainn.