Feum air atharrachaidhean bunaiteach a thaobh aiseagan

Tha feum air atharrachaidhean bunaiteach air an dòigh anns a bheil seirbheisean aiseig an taobh siar gan ruith, a rèir comataidh aig Holyrood.

Fhuair Comataidh na Còmhdhail gum bi coimhearsnachdan eileanach ann an cunnart mura tachair sin.

Ann an aithisg ùr, tha a' chomataidh ag ràdh gu bheil duilgheadasan mòra ann le cho sean 's a tha bàtaichean ChalMac. Tha iad ag ràdh cuideachd gu bheil gainnead de shoithichean a' fàgail nach eil an lìonra comasach air dèiligeadh ri trioblaidean sam bith a nochdas.

Thog buill na comataidh draghan cuideachd mu shiostam nan aiseagan is iad ag ràdh gu bheil e a' ciallachadh gu bheil diofar bhuidhnean buailteach a bhith a' coireachadh cach a chèile.

Mhol iad gum bu chòir do CMAL a dhol na phàirt de Chòmhdhail Alba ann am buidhinn air am biodh Aiseagan na h-Alba.

Tha a' chomataidh ag ràdh gum biodh mar sin barrachd tuigse aig Còmhdhail Alba mu shuidheachadh nan aiseasgan is gum biodh e nas soilleire cò air a bheil dleasdanas airson ghnothaichean aiseig.

Ministear ùr na Còmhdhail, Fiona Hyslop. Tha an aithisg ag innse gun robh ochdnar san dreuchd san deich bliadhna mu dheireadh.

A thaobh nam bàtaichean fhèin, tha an aithisg ag ràdh gu bheil na soithichean a tha CalMac is North Link a' cleachdadh sa chumatas 24.5 bliadhna a dh'aois.

Dh'iarr a' chomataidh gum mìnich Riaghaltas na h-Alba gu mionaideach mar a ghabhas sin a lùghdachadh gu 15 bliadhna.

Tha iad ag ràdh cuideachd gum bu chòir aiseagan ùra a bhith air an dealbh ann an dòigh is gum bi e nas fhasa an cleachdadh air feadh an lìonra.

A thuilleadh air sin, thog iad air na th' ann de dhaoine a tha air a bhith ann an dreuchd mhinistear na còmhdhail anns na bliadhnaichean mu dheireadh.

Thuirt cathraiche na comataidh, Èideard Mountain, gu bheil seo a' ciallachadh nach eilear a' dèiligeadh ri trioblaidean a tha a' nochdadh.

Thuirt Mgr Mountain gu bheil eòlas aig ministear ùr na còmhdhail, Fiona Hyslop, air an t-suidheachadh is i roimhe na leas-chathraiche air a' chomataidh fhèin, is gu bheil buill a' guidhe gach soirbheas dhi.

Tha mì-thoileachas mòr mu thrioblaidean ann an Uibhist a Deas gu seachd àraid an-dràsta.

A dh'aindeoin gach trioblaid a thog aithisg na comataidh, tha iad a' moladh gum bu chòir cùmhnant nan aiseasgan a thoirt do ChalMac fad deich bliadhna eile.

Thuirt iad gu bheil seo cudromach a thaobh leantalachd is gus barrachd troimh-chèile a sheachnadh.

Thig cùmhnant nan aiseagan gu ceann san Dàmhair 2024.

A' bruidhinn ri BBC Naidheachdan ge-tà, chuir Buidheann Aiseig Ghnothachasan Loch Baghasdail an aghaidh sin is iad ag ràdh nach eil CalMac idir comasach seirbheis cheart a thoirt seachad.

Chuir a' bhuidheann taic ge-tà, ri tòrr de na molaidhean eile san aithisg.

Aig an dearbh, thuirt am BPA Làbarach, Katy Clark, gum feum Riaghaltas na h-Alba taic-airgid èiginneach a lorg gus bàtaichean a bharrachd fhaighinn, is ma dh'fheumas iad, taic iarraidh bho Westminster.

Thuirt Riaghaltas na h-Alba gu bheil iad a' cur fàilte air an aithisg is gum beachdaich iad oirre gu faiceallach.