Muileann eachdraidheil air Taobh Siar Rois gu bhith air a ghlèidheadh

Thèid an togalach ath-nuadhachadh a chùm màith na coimhearsnachd

Shoirbhich le iomairt na coimhearsnachd airgead gu leòr a thrusadh airson Talla an t-Seann Mhuilinn am Baile Mac Ara a thogadh san 18mh Linn ath-nuadhachadh.

Chaidh aig Urras Coimhearsnachd Bhaile Mac Ara air £1.3m a thogail airson an togalach a ghlèidheadh a chùm maith a' phobaill.

Dhùin talla a' mhuilinn an Ceàrnag Bhaile Mac Ara bho chionn 40 bliadhna agus tha e an-diugh an droch staid.

Tha ball den urras, Mike Shucksmith, ag ràdh gu bheil cuimhne aig cuid air na dannsaichean, cuirmean agus cèilidhean a bha uair gan cumail ann nuair a bha iad òg.

"'S e a chuala sinn bhuapa gun còrdadh e riuthasan an cuid chloinne fhèin an aon seòrsa spòrs a bhith aca am broinn Talla an t-Seann Mhuilinn mar a bh' aca," thuirt e.

Chaidh an togalach a thoirt don choimhearsnachd ann an 1946

Chaidh an talla thoirt don choimhearsnachd ann an 1946 leis a' Bhana-Mhorair Hamilton timcheall air an àm a chaidh an còrr de dh'Oighreachd Bhaile Mac Ara a thoirt do dh'Urras Nàiseanta na h-Alba.

Tha Ball-Pàrlamaid na sgìre, Ceit Fhoirbeis, ag ràdh gu bheil e cudromach gum bi àite-cruinneachaidh aig coimhearsnachd.

Thuirt i: "Tha seo a' dol a dhèanamh diofar mòr don choimhearsnachd, clann agus daoine nas sine tighinn ri chèile."

Dealbh neach-ealain air cò ris a bhios an togalach coltach nuair a bhios an obair ath-nuadhachaidh deiseil

Tha an t-urras cuideachd air sealbh fhaighinn air seann làrach campachaidh a bha aig Fearann Coilltearachd na h-Alba.

Thèid sin a leasachadh mar àite airson tachartasan is eile do mhuinntir a' bhaile.

An cois a' mhaoineachaidh a fhuair a' choimhearsnachd tha airgead airson dithis oifigearan leasachaidh làn-ùine agus pàirt-ùine.

Tha iad an dochas Talla an t-Seann Mhuilinn ath-fhosgladh as t-Earrach 2026.