Chan eil maoin iasgairean "cothromach" am beachd BP nan Eilean Siar

Tha a' mhaoin a' cumail taic ri coimhearsnachdan iasgaich air feadh Bhreatainn

Dh'iarr Torcuil Crichton, ball nan Eilean Siar aig Westminster, air ministearan gun dèan iad ath-sgrùdadh air mar a tha taic-airgid do choimhearsnachdan iasgaich ga roinn a-mach.

Tha luach £360m ann am Maoin Fàis an Iasgaich is nan Cladaichean a chaidh fhoillseachadh le Roinn a' Bhìdh agus nan Cùisean Dùthchail (DEFRA) Diluain.

Tha Riaghaltas na h-Alba an urra ris an earrann a gheibh iadsan den mhaoin a tha ga toirt seachad a rèir àireamh an t-sluaigh.

Tha sin a' fàgail nach fhaigh Alba ach nas lugha na 8% dhith a dh'aindeoin agus gu bheil cha mhòr an dàrna leth de dh'iasg is maorach Bhreatainn a' tighinn àiste.

A' bruidhinn an Taigh nan Cumantan Diaordaoin, thuirt Mgr Crichton: "Tha mi a' smaoineachadh gu bheil ceist ann mu cho cothromach 's a tha an roinneachd, agus tha mi den bheachd gum bu chòir don mhinistear beachdachadh air.

"Tha mi an dòchas gun tèid ath-sgrùdadh a dhèanamh air a' mhaoin fhathast."

Tha riochdairean iasgaich agus Riaghaltas na h-Alba cuideachd air draghan a nochdadh mu mar a tha a' mhaoin ga lìbhrigeadh.

Sgrìobh Rùnaire nan Cùisean Dùthchail gu DEFRA a' gearan nach eil Alba a' faighinn a cuid chothromach den mhaoin.

Thuirt i: "Chuir sinn air adhart argamaidean soilleir, reusanta agus stèidhichte air fianais airson agus gum biodh roinn Alba den mhaoin a rèir meud roinn an iasgaich Albannaich, agus a bhith nas fhaisge air a' chuid 46% a bha Alba a' faighinn roimhe bhon airgead Eòrpach a tha an Rìoghachd Aonaichte a' faighinn."