Beachdan gan sireadh air èiginn taigheadais Earra-Ghàidheal
Geàrr-shealladh
Tha Comhairle Earra-Ghàidheal a' sireadh bheachdan air staing taigheadais na sgìre
Chaidh èiginn taigheadais ann an Earra-Ghàidheal a ghairm as t-samhradh
Tha an t-ùghdarras ionadail ag ràdh gu bheil e fìor chudromach gum faigh iad beachd a' phobaill
- Air fhoillseachadh
Tha Comhairle Earra-Ghàidheal is Bhòid a' sireadh bheachdan an t-sluaigh air buaidh staing an taigheadais san sgìre is mar bu chòir dèiligeadh ris.
Dh'aontaich an t-ùghdarras ionadail as t-samhradh èiginn taigheadais a ghairm ann an Earra-Ghàidheal ri linn cho gann 's a tha taighean aig prìs reusanta.
Tha iad a-nise airson cluinntinn bho dhaoine a thaobh mar a tha an suidheachadh a' toirt buaidh orra, is dè bu mhiann leotha fhaicinn airson dèiligeadh ris.
Dh'innis ceannard na Comhairle, Robin MacMhuirich, gun do dh'ainmich iad suidheachadh èiginn gus aire a tharraing aig ìre ionadail is nàiseanta.
Thuirt e mura tèid dèiligeadh ris an staing a th' ann, gum faodadh e fìor dhroch bhuaidh a thoirt air coimhearsnachdan, seirbheisean poblach, is eaconomaidh Earra-Ghàidheal is Bhòid.
Tha ceannardan leasachaidh is fàs eaconomaich aig Comhairle Earra-Ghàidheal is Bhòid, Fearghas Moireach, ag ràdh gu bheil e glè chudromach a-nise gun tèid guth a' phobaill a chluinntinn.
"Tha e dìreach bunaiteach gum faigh sinn beachdan dhaoine.
"As aonais sin, cha bhi dealbh slàn againn air an t-suidheachadh a th' ann, agus 's dòcha gum bi beachdan is fuasglaidhean aig daoine air nach do smaoinich sinn thuige seo", thuirt e.
Gheibhear an suirbhidh an seo, taobh a-muigh is bidh e fosgailte gu deireadh na Dàmhair.