SSEN a' cur taic ri sgeama taigheadais ùir air iomall Steòrnabhaigh

An Leas-Phrìomh Mhinistear, Ceit Fhoirbeis (deas) air an làraich Diciadain agus obair ullachaidh air tòiseachadh

Dh'innis SSEN gun tug iad na grunn mhilleanan notaichean airson faisg air 100 taigh a thogail mar phàirt den phròiseact 'son bun-structar an dealain a leasachadh sna h-Eileanan an Iar.

Togaidh a' chompanaidh stèisean HVDC agus fo-stèisean AC air mòintich Àranais air iomall Steòrnabhaigh, le càball-dealain ùr fon mhuir eadar Leòdhas agus tìr-mòr.

Tha aonta aca leis a' chompanaidh-togail CalMax a tha a' moladh sgeama sam bi 94 dachaigh air fearann ri taobh Port-adhair Steòrnabhaigh.

Bidh na taighean a' chiad ghreis nan dachaighean don luchd-obrach a bhios a dhìth airson Hub Leòdhais SSEN, ma 's e agus gum faighear cead a dhol air adhart leis.

Nuair a bhios an leasachadh sin deiseil, bidh a' mhòr-chuid de na taighean rim faighinn air prìs reusanta do mhuinntir an àite tro cho-bhanntachd eadar CalMax agus a' bhuidheann-taigheadais, Tighean Innse Gall (TIG).

Chaidh an naidheachd fhoillseachadh madainn Dicadain is an Leas Phrìomh Mhinistear Ceit Fhoirbeis a' tadhal air Leòdhas.

Thuirt a' Bh-Ph Fhoirbeis gur e eisimpleir fìor mhath a th' ann air na buannachdan a thig à fàs ann an gnìomhachas na cumhachd ath-nuadhachail, is mar a gheibh a' choimhearsnachd buannachd às "fad ghinealachan".

An làrach bhuidhe far a bheilear airson 94 taighean a thogail ri taobh an raon-laighe

Tha SSEN ag ràdh gu bheil iad am beachd maoineachadh mòr a bharrachd luach na deichean mhilleanan notaichean a thoirt don phròiseact aon uair agus gun tòisich an obair togail.

A' bruidhinn aig an làraich, thuirt Stiùiriche Phròiseactan Far-Chladach aig SSEN, Sandy Mac an t-Sagairt, gu bheil iad "fhathast a' coimhead air àitichean-fuirich eile don luchd-obrach a dh'fhàgas dìleab bhuannachdail do Leòdhas".

Thuirt Stiùiriche ChalMax, Dòmhnall MacAoidh: "Tha sinn an dòchas 30 obraichean ùra a chruthachadh an cois a' phròiseict seo, preantasan nam measg, agus le suas ri 100 luchd-obrach gu bhith an sàs ann, cuiridh e gu mòr ris an eaconomaidh ionadail cho math ri dachaighean nach eil ro dhaor a thoirt seachad."

Plana den sgeama taigheadais a tha CalMax a' moladh ri taobh Port-Adhair Steòrnabhaigh

Tha Iain MacCullaich, Cathraiche TIG, ag ràdh "gum bi leasachadh Leòdhais na chiad cheum sa phlana 10 bliadhna aca taigheadas beag-chosgais a leasachadh air feadh nan Eilean Siar".

Tha SSEN ag amas air 1,000 dachaigh ùr a thoirt seachad air feadh cheann a tuath na h-Alba mar phàirt den obair-leasachaidh air lìonra an dealain gus coinneachadh ri targaidean cumhachd ath-nuadhachail agus tèarainteachd cumhachd na dùthcha.

Gheibh sibh barrachd fiosrachaidh mu Hub Leòdhais agus Ceangal HVDC nan Eilean Siar aig SSEN an seo.