Turas sgrìobhaidh a New Zealand do Dhòmhnall S Moireach

Fhuair an sgrìobhadair Leòdhasach Dòmhnall S Moireach, a tha aithnichte airson leabhraichean mar 'As the Women Lay Dreaming', agus 'The Guga Hunters', Comhaltachd Sgrìobhaidh ann an New Zealand an ath-bhliadhna.

'S e Ionad Eòlais na h-Alba agus na h-Èireann aig Oilthigh Otago ann an Dunedin a tha air cùl seo.

Chuir stiùiriche an ionaid, Liam McIlvanney, fàilte air an naidheachd.

Thuirt e gum bi e fìor mhath do dh'oileanaich agus dhan choimhearsnachd anns an fharsaingeachd gum bi sgrìobhadair cho math agus cho eòlach aca ann an Dunedin.

Bha e cuideachd ag ràdh gu bheil daonnachd is sgil an-còmhnaidh follaiseach na obair.

Bidh an t-urram seo ga thoirt do sgrìobhadairean Albannach is Èireannach, bliadhna mu seach.

Bidh Maighstir Moireach, a tha a' fuireach ann an Sealtainn, ann an New Zealand anns an Lùnastal agus an t-Sultain an ath-bhliadhna.

Ged a 's e seo a' chiad turas a bhios aig Dòmhnall S Moireach dhan dùthaich, tha e ag ràdh gum biodh e tric a' cluinntinn sgeulachdan mu New Zealand na òige ann an Dail bho Dheas ann an Nis.

Bhruidhinn e air Aithris na Maidne Diardaoin mu na ceanglaichean a tha eadar na h-Eileanan an Iar is Sealtainn agus an sgìre seo de New Zealand: "Tha Gaelic agus Shetland Club shìos ann an Dunedin."

Thuirt Mgr Moireach gum bi e ri teagasg agus rannsachadh ann an New Zealand agus gum bu chòir dhan turas obair chruthachail a bhrosnachadh.

Thuirt e: "Chan eil dut sam bith agam gun tig sgrìobhadh a-mach às."

Tha mòran siubhail ron ùghdar an ath-bhliadhna.

A thuilleadh air turas New Zealand, thuirt e gum bi e ann an Canada anns a' Ghiblean an ath-bhliadhna agus gun deach iarraidh air a dhol a dh'Astràilia cuideachd.