Sgitheanach fo chasaid muirt ga mheas fhèin mar fhulangaiche, chuala cùirt

Thathar a' cumail a-mach gun deach John MacFhionghain a mhurt na dhachaigh san Lùnastal 2022

Tha fireannach a tha fo chasaid gun tug e ionnsaighean le sgithinn agus le gunna san Eilean Sgitheanach agus air tìr-mòr ga fhaicinn fhèin mar fhulangaiche, chuala an Àrd-Chùirt ann an Dùn Èideann.

Dh'innis lighiche-inntinn foireansach don chùis-lagha an aghaidh Fhionnlaigh Dhòmhallaich gun robh e a' fulang le post traumatic stress disorder agus trom-inntinn.

Thuirt an Dtr Alasdair Morris gun do dh'innis Mgr Dòmhnallach dha gun do bhris a shlàinte inntinn agus bodhaige, agus gun robh e duilich dha fad a bheatha dèiligeadh ri daoine agus suidheachaidhean.

Tha Mgr Dòmhnallach, 41, a' dol às àicheadh gun do dh'fheuch e ri a bhean agus dithis eile a mhurt. Chuir e air adhart dìon sònraichte nach robh e aige fhèin an co-cheangal ri casaid eile, gun do mhuirt e John MacFhionghain.

Thuirt an Dtr Morris gun robh Mgr Dòmhnallach, 41, "ga fhaicinn fhèin mar am fulangaiche sa h-uile càil seo".

Chuala a' chùirt roimhe gu bheil Mgr Dòmhnallach le autism, agus chaidh faighneachd don lighiche-inntinn mu aithisg a rinn saic-eòlas air.

Fianaisich eòlach

Thuirt e, nuair a thigeadh e do na casaidean air, nach robh an autism aige a' fàgail nach aithnicheadh e an diofar eadar ceàrr agus ceart agus nach b' urrainn dha chumail fhèin fo smachd.

Thuirt an Dtr Morris: "Dh'aontachainn gu bheil an ASD aige (autism spectrum disorder) aig ceann ìosal an speactraim."

'S e aon de cheathrar shaic-eòlaichean agus lighichean-inntinn a thathar an dùil a bheir seachad fianais aig a' chùis-lagha mar eòlaichean.

Thathar a' fàgail air Mgr Dòmhnallach gun do dh'fheuch e ri a bhean, Rowena Dhòmhnallach, 34, a mhurt air an 10mh den Lùnastal 2022 aig dachaigh an teaghlaich ann an Tarsgabhaig an Slèite an ceann a deas an Eilein Sgitheanaich le bhith ga sàthadh grunn thursan.

Tha e cuideachd fo chasaid gun do mhuirt e a bhràthair-cèile, John MacFhionghain, air an aon là le bhith a' losgadh air le gunna aig a dhachaigh ann an Teanga san aon sgìre.

Tha dà chasaid eile na aghaidh gun do rinn e oidhirp air John Don MacCoinnich agus a bhean, Fay, a tha le chèile 65, a mhurt le bhith a' losgadh orra le gunna-froise nan dachaigh san Dòrnaidh air Taobh Siar Rois.

Tha a' chùis-lagha air beulaibh na Bana-Mhorair Druimeanach a' leantainn.

Tuilleadh air an sgeulachd seo