Plana airson 95 dachaighean ùra ann an Ulapul

Tha Comhairle na Gàidhealtachd am beachd 95 dachaighean a thogail ann an Ulapul.

Tha iad a' moladh gum biodh taigheadas ri fhaotainn air màl reusanta agus dachaighean prìobhaideach air talamh bàn sear agus tuath air raon-goilf a' bhaile.

Tha luchd-còmhnaidh ann air draghan a thogail nach eil taighean gu leòr ann an Ulapul agus san sgìre mu chuairt a tha ri fhaotainn aig prìs chothromaich.

Fhuair aithisg a dh'fhoillsich Compàirteachas Planaidh Coimhearsnachd na Gàidhealtachd san Dùbhlachd an-uiridh gun robh dìth taigheadais shaoir na thrioblaid mhòr air Taobh Siar Rois, cho math ris na sgìrean timcheall air Loch Aillse agus Srath Pheofhair.

Thuirt i gun robh tòrr dhàrna dachaighean agus àiteachan-fuirich do luchd-turais ann agus gun robh iad sin a' cur phrìsean thaighean an-àirde agus a' fàgail nach robh ach glè bheag de thaighean do mhuinntir an àite.

Thuirt an aithisg gun robh urrasan coimhearsnachd agus comainn taigheadais a' toirt seachad dachaighean a bha comasach do dhaoine ionadail pàigheadh air an son.

Tha Comhairle na Gàidhealtachd air gealltainn gun dèilig iad ri dìth taigheadais san sgìre, ach tha iad a' tomhas gum bi 24,000 dachaigh ùr a dhìth thairis air an ath 10 bliadhna.

An-uiridh, thuirt iad gum biodh cruaidh-fheum air àiteachan-fuirich don fheadhainn a thig a dh'obair aig Saor-Phort Uaine Inbhir Nis agus Chrombaigh agus dùil gum bi 8,400 obair ri lìonadh an cois a' phròiseict sin.