£150,000 do champas spòrs san Àth Leathann
- Air fhoillseachadh
Gheibh Àrainn Coimhearsnachd Ceann a Deas an Eilein Sgitheanaich £150,000 airson goireasan spòrs sa sgìre a leasachadh.
Tha e mar phàirt de mhaoineachadh luach £451,038 bho spòrsalba a gheibh ochd pròiseactan coimhearsnachd agus spòrs.
Bidh na goireasan spòrs ùra an ceann an deas an Eilein Sgitheanaich an cois an leasachaidh airson bun-sgoil ùr a thogail san Àth Leathann.
A' bruidhinn an-uiridh nuair a chaidh planaichean airson na sgoile ùire agus hub coimhearsnachd fhoillseachadh, thuirt an comhairliche Iain MacFhionnlaigh gur e "call mòr a th' ann nach eil na goireasan againn ann an ceann a deas an eilein" do dhaoine òga.
Thuirt e gun robh aca glè thric ri siubhal cha mhòr dà uair de thìde a Phort Rìgh agus air ais "airson a dhol an sàs ann an gnothaichean taobh a-muigh na sgoile is rudan mar bhall-coise a chluich".
Tha Iain MacFhionnlaigh ag ràdh gur e ceum mòr air adhart a tha seo
Tha an comh MacFhionnlaigh a-nise ag ràdh gur e "naidheachd uabhasach math" a th' ann gu bheil taic-airgid a' tighinn.
Rinn e moladh air oidhirp na coimhearsnachd gus an ìre seo a ruighinn.
Thèid an taic-airgid ùr a chosg air pàirc 3G le solais a leigeas le lùth-chleasachd agus geamaichean ball-coise, rugbaidh agus iomain a dhol air adhart air a' gheamhradh agus an droch shìde.
Thuirt Shirley Ghrannd, Cathraiche Àrainn Coimhearsnachd Ceann a Deas an Eilein Sgitheanaich gur e ceum cudromach a thaobh na planaichean aca a thoirt gu buil.
"Dh'fhaodadh gun tig fàs mòr air àireamh an t-sluaigh an ceann a deas an Eilein sna beagan bhliadhnaichean ri teachd agus tha sinn air ar dòigh gu bheil buidheann-mhaoin ag aithneachadh gu bheil cruaidh fheum air airgead a chosg air bun-structar riatanach a chùm slàinte agus sunnd na coimhearsnachd," thuirt i.
Tha spòrsalba air còrr is £277m de mhaoineachadh Riaghaltas na h-Alba agus a' Chrannchair Nàiseanta a thoirt seachad do bhuidhnean coimhearsnachd agus ùghdarrasan ionadail airson goireasan spòrs a leasachadh bhon Ghiblean 2004.
Cead do stuth YouTube?
Tha stuth Google YouTube an cois an artaigil seo. Tha sinn a’ sireadh cead bhuat mus tèid sìon luchdachadh, oir dh’fhaodadh iad ‘briosgaidean’ agus teicneòlas eile a chur an sàs. ‘S dòcha gum biodh tu airson poileasaidh nam briosgaidean aca a leughadh, taobh a-muigh a leughadh agus am poileasaidh prìobhaideachd aca, taobh a-muigh mus tèid thu air adhart. Airson sùil a thoirt air an stuth seo, tagh ‘Gabh ris agus lean ort’.