Dùil ri bhòt air cìs turasachd air Ghàidhealtachd

Bhiodh aig daoine ri 5% a bharrachd a phàigheadh airson àite-fuirich fon phlana

Thèid iarraidh air comhairlichean na Gàidhealtachd Diardaoin taic a chur ris a' chiad ìre ann a bhith a' stèidheachadh cìs turasachd agus cead a thoirt seachad 'son co-chomhairle fad trì mìosan.

Tha an t-ùghdarras ionadail ag ràdh gun deadh £10m a thogail gach bliadhna le cìs de a seòrsa.

Tha dragh air cuid ge-tà, mu mar a dh'obraicheadh i.

"Tha eagal orm gu bheil Roinn na Gàidhealtachd air an inntinn a dhèanamh suas mar thà, mu dheidhinn seo," thuirt Anna Mhàrtainn aig a bheil àite-fuirich san Eilean Sgitheanach.

"Chan eil fhios agam carson a tha 5% air.

"Chan eil mi an aghaidh cìs turasachd mar sin ach chan eil fhios agam carson ma tha daoine a' pàigheadh an t-uabhas airson a dol a-staigh gu taigh-òsta gu bheil aca ri 5% a phàigheadh.

"'S dòcha gum biodh e na b' fheàrr dìreach £2 gach duine no rudeigin a chur air dòigh," thuirt i.

Tha ceist air Ms Mhàrtainn cuideachd am feum daoine a tha a' siubhal airson an cuid obrach, no airson a dhol dhan dotair a' chìs a phàigheadh.

Tha ceist oirre cuideachd cò tha a' cumail smachd air an airgead 's a' dearbhadh gun tèid a chosg air leithid bun-structar a chumail suas mu choinneimh buaidh na turasachd.

Tha comhairlean air feadh Alba a' beachdachadh air cìs den leithid a chur air turasachd agus uallach mòr air ùghdarrasan ionadail a thaobh ionmhais.